माढा तालुक्यातील निमगाव टें येथील जिल्हा परिषद प्राथमिक शाळा, येळे वस्ती येथे कार्यरत असलेला प्रविण नवनाथ शिंदे हा शिक्षक शाळेवर शिकवण्या ऐवजी करमाळा मतदार संघाचे आमदार संजयमामा शिंदे यांच्याकडे स्वीय सहाय्यक म्हणून काम करत असल्याचा धक्कादायक खुलासा जनशक्ती संघटनेचे अतुल खूपसे पाटील यांनी केला असून यासंदर्भात गटविकास अधिकारी, गटशिक्षणाधिकारी यांची सखोल चौकशी करून संबंधित शिक्षकावर कारवाई करावी अथवा तशाच प्रकारे मला जिल्हा परिषद शाळेचा शिक्षक पीए म्हणून देण्यात यावा अन्यथा जिल्हा परिषद सोलापूर येथे संबळ वाजवून आंदोलन करणार असल्याचा इशारा अतुल खूपसे पाटील यांनी एका निवेदनाद्वारे दिला.
या दिलेल्या निवेदनात पुढे म्हटले आहे की, सदरचा प्रवीण शिंदे नामक शिक्षक दि. १०/०८/१९९२ रोजी खडके वस्ती येथे जि. प. शाळेत रुजू झाले. त्यानंतर १९९९ साली टेंभुर्णी त्यानंतर २००० साली निमगाव (टें) नंतर २००१ मध्ये उपळवटे, २००१ मध्ये खडके वस्ती, २०१० मध्ये ताटे वस्ती दहिवली, २०१७ मध्ये गंगामाई नगर कारखाना आणि २०१८ मध्ये येळे वस्ती निमगाव(टें) येथे कार्यरत आहेत परंतु हे महाशय फक्त पेरपरवरच शाळेत आहेत.
यांचेच गावचे रहिवाशी असणारे विकासप्रिय, लोकप्रिय, शेतकऱ्यांच्या नावावर अफाट कर्ज काढणारे करमाळ्याचे नेतृत्व आमदार संजयमामा शिंदे यांचे खाजगी स्वीय सहाय्यक (पी.ए) म्हणून १९९२ पासून काम करत आहेत. पगार शासनाची घेतात परंतु काम आमदारचे करतात. ज्या शाळेत प्रविण शिंदे गुरुजी म्हणून सध्या कार्यरत आहेत त्या ठिकाणी पहिली ते चौथी असा वर्ग भरतो. ती शाळा आमदार महोदय संजयमामा शिंदे यांच्या गावातील येळे वस्ती या ठिकाणची आहे.
तेथे सुख सुविधांपासून वंचित असणारा समाज राहतो त्या विध्यार्थ्यांचे भविष्य घडविण्यासाठी शासनाने दोन शिक्षक नियुक्त केले आहेत परंतु तेथे एकच शिक्षक काम पाहतो. त्या शाळेत १ ली ते ४ थी असे ४ वर्ग असल्याने पालकाने वर्गणी करून त्याठिकाणी अच्युत हरीलाल राजुरे या वडाचीवाडी ता. माढा येथील सुशिक्षित बेरोजगार तरुण विद्यार्थ्यांना शिकवण्यासाठी लावला आहे.
मात्र शासनाची पगार घेऊन आमदारची चाकरी करणाऱ्या शिक्षक(पी.ए) प्रविण शिंदे यांना बोलण्यास कोणताच पालक धजावत नसून विद्यार्थ्यांचे मात्र मोठे हाल होत आहेत. विशेष म्हणजे १९९२ पासून म्हणजे शिक्षक म्हणून पदभार घेतल्यापासून या शिक्षकाने शाळेचे तोंडही पहिले नाही. विद्यार्थ्यांची ओळखही नाही. त्याने शासनाचा सर्व मोबदला घेतला आहे. वेतनवाढ घेतली आहे, सुट्ट्या घेतल्या आहेत. तरी त्या शिक्षकाला त्वरित शाळेवर लावा आणि या शिक्षकाला पाठीशी घालणाऱ्या केंद्रप्रमुख व गटशिक्षण अधिकारी यांचेवर कायदेशीर कारवाई करा किंवा संजयमामा शिंदे हे करमाळ्याचे आमदार असले तरी मी देखील करमाळा विधानसभा लढलो आहे. म्हणून मला पण १ शिक्षक असाच पी. ए. म्हणून द्या किंवा तोच शिक्षक १५-१५ दिवस दोघांनाही द्या अन्यथा दि. १६/१०/२०२३ रोजी जि. प. सोलापूर यांचे समोर घटस्थापना करून बेमुदत आराधी मेळा आंदोलन करण्यात येईल. कायदा व सुव्यवस्थेचा प्रश्न निर्माण झाल्यास सर्वस्वी प्रशासन जबाबदार राहील याची प्रामुख्याने नोंद घ्यावी.
