नाशिक-पुणे महामार्गावर अपघातांचे सत्र सुरूच असून आज पुन्हा एकदा सिन्नरजवळील मोहदरी घाटात भीषण अपघात झाला आहे. या अपघातात पाच जणांचा जागीच मृत्यू झाला आहे, तर आठ जण गंभीर जखमी झाले आहेत. जखमी प्रवाशांना नाशिकमधील खासगी रुग्णालयात दाखल करण्यात आलं आहे. मृतांमध्ये तीन तरुणी आणि दोन तरुणांचा समावेश असल्याचे समजते.
मिळालेल्या माहितीनुसार, नाशिकमधील गंगापूर रोडवरील कॉलेजच्या विद्यार्थ्यांचा एक ग्रुप बाहेरगावी गेला होता. मात्र मोहदरी घाटात त्यांच्या कारचे टायर फुटल्याने त्यांची कार इतर दोन वाहनांवर आदळली. या कारने डिव्हाडर पार करून रस्त्याच्या विरुद्ध दिशेने जाणाऱ्या इतर दोन वाहनांना धडक दिली.
अपघातात वाहनांचा चक्काचूर झाला आहे. अपघाताची माहिती मिळताच घटनास्थळी तातडीने पोलीस प्रशासनाने धाव घेतली असून मदतकार्य सुरू आहे.
दरम्यान, काल दुपारी देखील नाशिक-पुणे महामार्गावर शिंदे पळसे या गावाजवळ बसने धडक दिल्याने दोन जण जागीच ठार तर २५ जण जखमी झाल्याची घटना घडली होती. त्यातच आज पुन्हा सिन्नरजवळ मोहदरी घाटात भीषण अपघात झाला आहे.
