पिंपरी : पीएमपी बस अडवून चालकाला बेदम मारहाण करण्यात आली. ही घटना शनिवारी (३० जानेवारी) सायंकाळी जुनी सांगवी येथे घडली. या प्रकरणी सांगवी पोलिसांनी दोघांना अटक केली आहे.
स्वप्नील बाळासाहेब तिखे (वय २२, रा. पाषाण गाव) आणि शुभम अरविंद जाधव (वय २१, रा. जाधव वाडा, पाषाण) अशी अटक केलेल्या आरोपींची नावे आहेत. याबाबत श्रीकांत दत्तात्रय भोकरे (वय ३१, रा. फुरसुंगी) यांनी सांगवी पोलिस ठाण्यात फिर्याद दिली आहे.
पोलिसांनी दिलेल्या माहितीनुसार, फिर्यादी भोकरे पीएमपी बसचालक आहेत. ते शनिवारी दुपारी स्वारगेट-सांगवी बसवर कर्तव्यावर होते. सांगवी येथून स्वारगेट येथे बस घेऊन जात असताना जुनी सांगवी येथे वेताळ महाराज मंदिराजवळ दुचाकीवरून आरोपी आले. आरोपींनी भोकरे यांना शिवीगाळ करून मारहाण केली. बसच्या काचा फोडून नुकसान केले. सरकारी कामात अडथळा निर्माण केला. पोलिसांनी दोन्ही आरोपींना अटक केली आहे. पुढील तपास सांगवी पोलिस करीत आहेत.
