२०१९ च्या तिरंगी लढतीत सुशीलकुमार शिंदेंना मिळाले होते ६ हजार १९६ मताधिक्य
भाजपचा ‘उपरा’ तर ‘वंचित’ चा नवखा उमेदवार या जनभावनेचा फटका नक्की कुणाला बसणार ?
२०१९ च्या लोकसभा निवडणुकीत पंढरपूर -मंगळवेढा मतदार संघातुन सोलापूर लोकसभेसाठी भाजपचे उमेदवार डॉ. जयसिद्धेश्वर स्वामी यांना मोठे मताधिक्य मिळेल अशी अपेक्षा व्यक्त होत होती.आणि त्यामागे कारणेही तशीच होती.भाजपचे विधान परिषदेचे आमदार प्रशांत परिचारक यांच्यावर भाजपचे नवख्या असलेल्या जयसिद्धेश्वर स्वामी याना मताधिक्य मिळवून देण्याची जबाबदारी टाकली होती.या निवडणुकीत कॉग्रेसकडून माजी केंद्रीय गृहमंत्री सुशीलकुमार शिंदे उमेदवार होते आणि कॉग्रेसचे आमदार स्वर्गीय भारतनाना भालके यांच्यावर सुशीलकुमार शिंदे यांना मताधिक्य देण्याची जबाबदारी पक्षाने सोपविली होती.२०१९ लोकसभा निवडणुकीत सोलापूर मतदार संघात आणखी एक प्रवाह मोठ्या आक्रमपणे व्यक्त होताना दिसून येत होते.भारतीय राज्य घटनेचे शिल्पकार भारतरत्न डॉक्टर बाबासाहेब आंबेडकर यांचे नातू वंचित बहुजन आघाडीच्या माध्यमातून प्रथमच सोलापूर लोकसभा निवडणूक लढवीत होते आणि आपले एक मत बाबासाहेबांच्या नातवाला देण्याची हि तर संधी चालून आली आहे अशीच भावना मागासवर्गीय मतदार व्यक्त करताना दिसून येत होते.यातूनच पंढरपूर -मंगळवेढा विधानसभा मतदारसंघात भाजप -कॉग्रेस आणि वंचित बहुजन आघाडी यांच्यात जोरदार चुरस पहावयास मिळाली.आणि २०१९ च्या निवडणुकीत पंढरपूर-मंगळवेढा मतदार संघातून कॉग्रेसचे सुशीलकुमार शिंदे यांना ८४ हजार १३५ तर भाजपचे जयसिद्धेश्वर स्वामी यांना ७७ हजार ९३९ तर वंचित बहुजन आघाडीचे ऍडव्होकेट प्रकाश आंबेडकर यांना २९ हजार ३२३ इतकी मते मिळाली होती.
त्यावेळी राज्यात महायुतीचे सरकार असताना आणि देशात मोदी लाट असतानाही पंढरपूर-मंगळवेढा विधानसभा मतदार संघातून भारतीय जनता पक्षास मताधिक्य मिळाले नव्हते.यात पंढरपूर तालुक्यातील कासेगाव गटाने मोठी भूमिका बजावत सुशीलकुमार शिंदे यांना २ हजार ६१० इतके मताधिक्य दिले होते तर गादेगाव गटातून देखील शिंदे यांना जवळपास २ हजार इतके मताधिक्य मिळाले होते.
आता २०२४ च्या लोकसभा निवडणुकीत कॉग्रेसकडून प्रणिती शिंदे या उमेदवार आहेत तर भाजपकडून यावेळी स्थानिक उमेदवार द्यावा अशी अपेक्षा व्यक्त होत असतानाच माळशिरसचे आमदार राम सातपुते यांना भाजपकडून उमेदवारी देण्यात आली आहे तर वंचित बहुजन आघाडीकडून राहुल गायकवाड हे मैदानात उतरणार आहेत. राहुल गायकवाड हे मागील सोलापूर लोकसभा निवडणुकीत उतरलेले प्रकाश आंबेडकर यांच्यापेक्षा तुलनेने नवखे आहेत आणि मागील वेळी मतविभागणी मुळे भाजपचा फायदा झाला अशी धारणा असलेला मतदार यावेळी वेगळी भूमिका घेऊ शकतो.त्यामुळेच यावेळी पंढरपूर-मंगळवेढा विधानसभा क्षेत्रांत कॉग्रेसकडे स्वर्गीय भारतनाना भालके यांच्या सारखा आक्रमक चेहरा नसला तरी मराठा आरक्षण प्रश्नी राज्य सरकारकडून फसवणूक झाल्याची भावना असलेला काही मराठा मतदार,अबकी बार ४०० पार चा नारा देणारे भाजपवाले घटना बदलणार अशी भाजप विरोधकांकडून उठलेली आवई आणि अशातच पंढरपूर-मंगळवेढा तालुक्यात भाजपचे बुथ वॉरियर्स आमदार आवताडेंचे आणि पंढरपूर शहर तालुक्यात भाजपच्या परिचारक समर्थकांत आमदार आवताडे यांच्या कार्यपध्दतीबद्दल असलेली नाराजी,कॉग्रेसने २०२४ च्या उमेदवारीचा शब्द दिल्यास भगीरथ भालके सर्मथक यांनी कॉग्रेसला सहकार्य करण्याची तयारी दाखविल्याची चर्चा,कॉग्रेसच्या उमेदवार प्रणिती शिंदे यांची सोलापूरची लेक अशी प्रतिमा,आक्रमकपणे त्या करीत असलेली टीका.पंढरपुर-मोहोळ मतदार संघात मोहिते पाटील यांना मानणारा वैयक्तिक मतदार वर्ग,मांडवे येथील आमदार राम सातपुते यांच्या आभार सत्कार सोहळ्यात स्टेजच्या मागील बॅनरवर मोहिते पाटील यांना वगळून केवळ कमळाचा फोटो,मोहिते पाटील यांची संभाव्य भाजपा विरोधातील बंडखोरी अशा अनेक बाबी विचारात घेतल्या तर भाजपचे उमेदवार राम सातपुते यांना पंढरपूर -मंगळवेढा मतदार संघ वाटतो तेव्हडा सोपा नाही असेच निरीक्षण राजकीय निरीक्षक नोंदवताना दिसून येत आहेत.
अशातच भाजपचे आमदार समाधान आवताडे यांनी निधीच्या मंजुरीच्या माध्यमातुन जनता समाधानी आहे असा केलेला समज आणि याच वेळी पंढरपूर शहरातील जनतेच्या मूलभूत प्रश्ना बाबत आमदार आवताडे हे बोटचेपी भूमिका घेत निधी मंजुरीत समाधान मानत असल्याची भावना हे सारे पाहता भाजपचे रामभाऊ सातपुते यांना पंढरपुर-मंगळवेढा मतदार संघ मताधिक्य मिळविण्यासाठी वाटतो तेवढा सोपा नाही असेही निरीक्षण राजकीय निरीक्षक नोंदवित आहेत.
