रिक्षा खरेदीसाठी पैसे देण्यास आईने नकार दिल्याने मुलाने शिवीगाळ करून आईच्या डोक्यात दगड मारला. गांधीनगर, पिंपरी येथे शुक्रवारी दुपारी हा प्रकार घडला. अतुल सुगंधराव खंडागळे (वय ३०) याच्या विरोधात पोलिसांनी गुन्हा दाखल केला. या प्रकरणी विमलबाई खंडागळे यांनी पिंपरी पोलीस ठाण्यात फिर्याद दिली आहे.
पोलिसांनी दिलेल्या माहितीनुसार, फिर्यादी त्यांच्या भावाला भेटायला जाण्यासाठी गांधीनगर कमानीसमोर आल्या. त्या वेळी त्यांचा मुलगा अतुल तेथे आला. रिक्षा खरेदीसाठी त्याने पैशांची मागणी केली. पैसे देण्यास त्यांनी नकार दिला. याचा राग आल्याने मुलाने आईला शिवीगाळ करून धमकी दिली; तसेच डोक्यात दगड मारून जखमी केले. सहायक फौजदार बाळकृष्ण दळवी तपास करीत आहेत.