तेलंगणातील महबूबाबाद जिल्ह्यात एक धक्कादायक घटना घडली आहे. येथे एका महिलेला चपलांची माळ घालून संपूर्ण परिसरात तिची धिंड काढण्यात आली. याचे कारण ऐकून अनेकांना धक्का बसला. या महिलेने दोन लोकांच्या मदतीने आपल्या दिराची हत्या केली होती.
आपणच दिराची हत्या केल्याची जाहीर कबुली या महिलेने दिली आहे. माझ्या पतीच्या मृत्यूनंतर माझा दीर माझ्याशी शरीरसंबंध ठेवण्याची गळ घालायचा. त्याचे हे वागणे मला सहन झाले नाही आणि म्हणून मी हे टोकाचे पाऊल उचलले, असे या महिलेने सांगितले. पोलिसांनी या प्रकरणी हत्येचा गुन्हा दाखल केला आहे.
घटनेबाबत मिळालेल्या माहितीनुसार, सोमवारी संध्याकाळी एका महिलेच्या गळ्यात चपलांची माळ घालून तिची परिसरात धिंड काढण्यात आली, अशी माहिती महबूबाबादच्या दोरनाकल पोलिसांनी दिली. या महिलेनेच तिचा दीर राजू याची हत्या केली असे महिलेच्या सासरकडील मंडळींचे म्हणणे आहे. तर, महिलेने देखील दिराची हत्या आपणच केल्याची कबुली दिली आहे. मात्र, महिलेला चपलांची माळ घालून धिंड काढत असतानाच पोलीस तेथे पोहोचले आणि त्यांनी या महिलेला ताब्यात घेतले.
या महिलेने पोलिसांना माहिती देताना सांगितले की, ‘माझ्या पतीचा ६ वर्षांपूर्वी मृत्यू झाला. त्यानंतर माझा दीर राजू हा माझ्याकडे शारीरिक संबंध ठेवण्यास सांगत असे. मी तुझी देखभाल करेन, म्हणून तू माझी इच्छा पूर्ण कर, असे ते मला म्हणत असे. तो मला दररोज छळायचा. त्याच्या रोजच्या छळाला कंटाळून शेवटीन मी दोन लोकांसोबत एक योजना आखली. त्यानुसार मी राजूची हत्या केली. हत्येनंतर मी राजूचा मृतदेह गावात दफन केला.’
दरम्यान, गेल्या अनेक दिवसांपासून राजू बेपत्ता असल्याचे सर्वांना कळीत झाले होते. त्यानंतर त्याचा मृतदेह दोरनाकल पोलीस ठाण्याच्या हद्दीत सापडल्याचे वृत्त आले. पोलिसांनी या मृतदेहाची ओळख पटवली. पोलीस या प्रकरणाचा करत होते. दरम्यानच्या काळात आरोपी महिलेच्या सासरकडील मंडळींनी आणि गावकऱ्यांनी या महिलेवर राजूची हत्या केल्याचा संशय जाहीर केला. त्यानंतर तिला चपलांचा हार घालून तिची धिंड काढली होती.
