गेल्या काही दिवसांमध्ये झारखंडमधील गुन्हेगारी घटनांमध्ये सातत्यानं वाढ होत असल्याचं दिसत आहे. विशेषत: प्रेमप्रकरण आणि अवैध संबंधांमध्ये यश न मिळाल्यानं खून होण्याच्या घटना वाढल्या आहेत.
मकर संक्रातींच्या रात्री राजगड जिल्ह्यात अशीच एक घटना घडली आहे. प्रेमात अपयशी ठरलेल्या प्रियकरानं आपल्या विवाहित प्रेयसीची निर्घृण हत्या केली आहे. हजारीबागमधील रामगड पोलीस स्टेशनच्या हद्दीत ही धक्कादायक घटना घडली आहे. अरमान खान उर्फ रॉकी बाबा नावाच्या व्यक्तीनं 14 जानेवारी रोजी विवाहित प्रेयसी ममताचा जीव घेतला.
मिळालेल्या माहितीनुसार ममता विवाहित होती आणि तिला तीन वर्षांचा मुलगा आहे. ममता विवाहित असूनही तिचं आणि अरमानचं अफेअर सुरू होतं, अशी माहिती प्राथमिक तपासात समोर आली आहे. आरोपी तिला आपल्यासोबत येण्यासाठी दबाव टाकत होता.
घटनेच्या दिवशीही तो तिला घेण्यासाठी आला होता. मात्र, ममतानं त्याच्यासोबत जाण्यास नकार दिल्यानं तो तिच्याशी भांडू लागला. त्याने तिला बेदम मारहाण केली. या भीषण घटनेबाबत मृत ममताची बहीण जया हिने आरोपी अरमानविरुद्ध हत्येचा गुन्हा दाखल केला आहे.