औसा पोलीस ठाण्यात दाखल असलेल्या गुन्ह्यात मदत करण्यासाठी तीन हजार रुपयांची लाच स्वीकारल्यानंतर पोलीस हवालदार राजेंद्र गोरख लामतुरे यांना लाचलुचपत प्रतिबंधक विभागाने रंगेहात पकडले. त्यांच्याविरुद्ध औसा पोलीस ठाण्यात गुन्हा दाखल करण्यात आला आहे.
पोलीस हवालदार राजेंद्र गोरख लामतुरे यांनी तक्रारदार यांना त्यांच्याविरुद्ध औसा पोलीस ठाण्यात दाखल झालेल्या गुन्ह्यात मदत करण्यासाठी 4 मे रोजी सुरुवातीस 5000 रुपयांची लाच मागणी करून तडजोडीअंती पहिला हप्ता 3,000 रुपये,तर दुसरा हप्ता 2,000 रुपये ठरला होता औसा पोलीस ठाण्यात शुक्रवारी सायंकाळी 5 वाजण्याच्या सुमारास आरोपी लोकसेवक लामतुरे यांनी तक्रारदारांकडून पहिला हप्ता म्हणून 3,000 रुपयांच्या लाचेची रक्कम पंचासमक्ष स्वीकारली.
लाचलुचपत प्रतिबंधक विभागाने त्यांना रंगेहाथ पकडले. पोलीस निरीक्षक भास्कर पुल्ली आणि त्यांच्या पथकाने ही कारवाई केली. पुढील तपास पोलीस निरीक्षक अन्वर मुजावर करत आहेत.
