राज्यामध्ये महिलांवर सातत्याने अत्याचाराच्या घटना घडत असताना परभणी शहरातील दर्गा रोड येथे रुग्णालयात घेऊन जाण्याच्या बहाण्याने बळजबरीने एका ११ वर्षीय मुलाला सोबत घेऊन त्याच्यावर अत्याचार करण्यात आल्याची घटना परभणी शहरात उघडकीस आलीय.
रविवारी (१३ मार्च) रोजी दुपारी सदर प्रकरणी आरोपीविरोधात कोतवाली पोलीस ठाण्यात अत्याचार, बालकांचे लैंगिक अत्याचारापासून संरक्षण अधिनियम अंतर्गत गुन्हा दाखल करण्यात आला आहे.
परभणी शहरातील दर्गा रोड भागामध्ये अकरा वर्षीय मुलगा खेळत असताना दगड लागून त्याचं डोकं फुटलं. मुलाला रुग्णालयात नेण्याच्या बहाण्याने सय्यद अन्सार सय्यद सईद हा त्याला बळजबरीने दवाखान्यात नेतो म्हणून घेऊन गेला. दवाखान्यात न नेता संबंधिताने या भागातील एका हॉलच्या पाठीमागे नेऊन मुलावर अत्याचार केला.
सदरील माहिती अकरा वर्षीय मुलाने आपल्या घरच्यांना दिल्यानंतर मुलाच्या आईच्या फिर्यादीवरून कोतवाली पोलिस ठाण्यात आरोपी अन्सार सय्यद सईद याच्या विरोधात गुन्हा दाखल करण्यात आला आहे.
दरम्यान, राज्यामध्ये महिला अत्याचाराच्या घटनेमध्ये वाढ झाली असताना परभणी शहरातील दर्गा रोडवर अकरा वर्षीय अल्पवयीन मुलावर अत्याचार करण्यात आल्यामुळे एकच खळबळ उडाली आहे. या प्रकरणाचा तपास पोलिस निरीक्षक शरद जर्‍हाड करत आहेत.
