एखाद्या कामाचा भरपूर मोबदला हवा असेल तर त्यासाठी पुष्कळ मेहनत करावी लागते. पण, जर कुणाला फक्त प्रेमाचे मेसेज पाठवून महिन्याला दीड लाख रुपये मिळत असतील तर? हे काम करणारी एक तरुणी सध्या सोशल मीडियावर चर्चेत आली आहे.
तिने एक व्हिडीओ प्रसारित करत आपल्या या अनोख्या कमाईच्या साधनाचा उल्लेख केला आहे. तिच्या म्हणण्यानुसार गेली तीन वर्षं तिने याच मार्गाने पैसे कमावले. तिला फक्त प्रेमळ मेसेज पाठवावे लागत असत. त्या बदल्यात तिला घसघशीत रक्कम मिळत होती.
या तरुणीचं नाव बेली हंटर असं आहे. बेली ही अमेरिकेची रहिवासी आहे. ती तीन वर्षांपूर्वी बफेलो वाईल्ड विंग्ज नावाच्या एका हॉटेलमध्ये वेट्रेस म्हणून काम करत होती. त्यावेळी तिथे एक मोठ्या वयाचा माणूस एका तरुणीसोबत जेवायला आला होता. बेलीने त्याला जेवण वाढलं. त्यानंतर या जेवणाचं बिल दिलं तेव्हा 2900 रुपयांच्या बिलावर त्याने 7400 रुपये इतकी टिप बेलीला दिली. त्यासोबत आपलं कार्ड देखील बेलीला दिलं.
त्या कार्डावरील क्रमांकावर बेलीने आभार मानण्यासाठी मेसेज केला, तेव्हा त्या माणसाने तिला पुन्हा एकदा जेवण वाढण्याविषयी विचारलं. त्यानंतर बेली आणि त्याचं बोलणं वरचेवर होऊ लागलं.
तिच्या म्हणण्याप्रमाणे तो अतिशय सभ्यपणे आणि मर्यादा राखून बोलत असे. असे गोड गोड मेसेज पाठवण्यासाठी तो तिला भरघोस रक्कम देत असे. जवळपास तीन वर्षं हे सगळं सुरू होतं. त्या पैशांनी आपण खूप खरेदी केली, असं तिचं म्हणणं आहे.
