फॅबटेक एज्युकेशन सोसायटी पुणे संचलित, फॅबटेक पब्लिक स्कूल अँड ज्युनिअर कॉलेजमधील पालकांच्या मनातील अनेक प्रश्नांच्या उत्तरासाठी सुजाण पालकत्वाची ऑनलाईन कार्यशाळा संपन्न झाली. या कार्यशाळेत प्रमुख व्याख्याते म्हणून अहमदाबाद , (गुजरात) येथील सौ. सुनयना पलसुले मॅडम होत्या. सुनयना मॅडमने सुजाण पालकत्वाची संकल्पना सोदाहरण समजून सांगितली. बालकाच्या प्रत्येक वयोगटात पालकांनी जागृत असणे गरजेचे असते. पाल्य सोळा वर्षाचा होईपर्यंत पालकांची मोठी जबाबदारी असते. बालक हा नेहमी प्रतिभासंपन्न असतो त्याची जाणीव पालकांना पालक या नात्याने होणे गरजेचे असते. पाल्य 16 वर्षाचा होईपर्यंत आई-वडिलांनी पाल्याचा सखा म्हणून भूमिका बजवावी. तसेच पालकांचे मुख्य कौशल्य बालकातील छुपे गुण बाहेर काढून त्याला पैलू पाडणे होय. त्याचप्रमाणे आजच्या काळाची गरज म्हणजेच एकत्र कुटुंबपद्धती आजी-आजोबांचे संस्कार,पण बदलत्या कुटुंब प्रणालीमुळे पालकत्वाचे रूप बदलत चाललेले आहे. अशावेळी या संक्रमण काळात पालकत्वाची कला व शास्त्र अवगत असणे गरजेचे आहे . पालक म्हणून आपण कमी पडत नाही ना? तसेच मुलांच्या शैक्षणिक, भावनिक,मानसिक अशा अनेक समस्या व चांगले पालक कसे व्हायचे, बालक-पालक सुसंवाद कसा साधायचा अशा अनेक विषयांवर सुनयना मॅडमने पालकांना मार्गदर्शन केले.
या कार्यक्रमासाठी पालकांनीही मोठ्या प्रमाणात ऑनलाईन उपस्थिती दर्शविली आणि सुनयना मॅडमला अनेक प्रश्न विचारून शंकेचे समाधान केले. हा कार्यक्रम संस्थेचे मॅनेजिंग डायरेक्टर श्री दिनेश रूपनर यांच्या उपस्थितीत पार पडला.या कार्यक्रमासाठी संस्थेचे कॅम्पस डायरेक्टर श्री संजय अदाटे व प्रशालेचे प्राचार्य श्री सिकंदर पाटील यांनी मार्गदर्शन केले. कार्यक्रमाचे सूत्रसंचालन प्रशालेच्या शिक्षिका कुमारी मृणाल राऊत यांनी केले. तर आभार सौ विद्या खाडे यांनी मानले .
