मुख्यमंत्री उद्धव ठाकरे यांच्या पत्नी आणि सामनाच्या संपादक रश्मी ठाकरे यांच्या बद्दल ट्विटरवर आक्षेपार्ह वक्तव्य करणाऱ्या भाजप पदाधिकाऱ्याला पोलिसांनी ताब्यात घेतले आहे. भाजप पदाधिकारी जितेन गजारीया यांना पोलिसांनी ताब्यात घेतले असून पोलिसांकडून गजारिया यांचा जबाब नोंदवण्याची प्रक्रिया सुरू झाली आहे.
जितेन गजारीया हे भाजपचे पदाधिकारी आहेत. त्यांनी मुख्यमंत्री उद्धव ठाकरे यांच्या पत्नी रश्मी ठाकरे यांच्याविरोधात ट्विट करत आक्षेपार्ह वक्तव्य केले. याप्रकरणी मुंबई पोलिसांनी जितेन गजारीयाला ताब्यात घेतले आहे. गजारीया यांनी आक्षेपार्ह ट्विट का केले? तसेच यामागचा उद्देश काय आहे? याबाबत गजारीयाची मुंबई पोलीस चौकशी करत आहेत.
रश्मी ठाकरे यांच्याविरोधात आक्षेपार्ह ट्विट केल्यामुळे महाविकास आघाडी सरकारच्या नेत्यांनी नाराजी व्यक्त केली आहे. गजारीया यांनी याआधी उपमुख्यमंत्री अजित पवार यांच्याबाबतीतही आक्षेपार्ह लिखाण केले होते. याप्रकरणी मुंबई पोलिसांनी त्यांना नोटीससुद्धा बजावली होती.
