अकोला तालुक्यातील म्हैसांग याठिकाणी तलाठी पदावर कार्यरत असलेली गायत्री सुनिल कोरडे हिने पेट्रोल पंपावरील कर्माचाऱ्यांची नजर चुकवून मोबाइल लंपास केल्याची घटना सीसीटीव्ही कॅमेऱ्यात कैद झाली आहे.
संबंधित घटना 6 एप्रिल 2021 रोजी अकोल्यातील अग्रसेन चौकातील पेट्रोल पंपावर घडली आहे. दरम्यान आरोपी महिला तलाठी याठिकाणी आपल्या दुचाकीत पेट्रोल भरण्यासाठी आली होती. यावेळी त्यांनी दुचाकीत पेट्रोल भरून झाल्यानंतर कर्मचाऱ्यांची नजर चुकवून पंपावरील मोबाइल फोन चोरला आहे.
सर्वत्र शोधाशोध करूनही कुठेही फोन आढळला नाही. शेवटी सीसीटीव्ही कॅमेरे चेक केले असता, एका महिला मोबाइल चोरताना आढळली. याप्रकरणी पेट्रोल पंप कर्मचाऱ्यानं अज्ञात महिलेविरोधात रामदासपेठ पोलीस ठाण्यात गुन्हा दाखल केला. संबंधित सीसीटीव्ही फुटेजच्या आधारे शोध घेतला असता, संबंधित मोबाइल चोर महिला म्हैसांग येथील तलाठी असल्याचं समोर आलं आहे. या घटनेचा पुढील तपास केला जात आहे.