कोरोनाच्या पार्श्वभूमीवर २०२२ मध्ये होणारी मुंबई महापालिकेची निवडणूक लांबणीवर पडण्याची शक्यता दूर झाली आहे. राज्य निवडणूक आयोगाने मुंबई महापालिकेच्या २०२२ मध्ये होणाऱ्या निवडणुकीला परवानगी दिली आहे.
कोरोनाच्या पार्श्वभूमीवर राज्यातील काही महानगर पालिकांच्या निवडणुका वर्षभरापासून लांबणीवर पडल्या आहेत. त्यामुळे मुंबई महानगर पालिकेच्या निवडणुकीबाबत काय तयारी करावी अशा आशयाचे पत्र पालिकेने राज्य निवडणुक आयोगाला पाठवले होते. त्यानुसार सोमवारी राज्य निवडणुक आयोग व मुंबई महापालिका निवडणूक विभागाची बैठक पार पडली.
या बैठकीत निवडणुकीची तयारी करण्याचे निर्देश आयोगाने दिले आहेत. याची सुरुवात प्रभांगाच्या फेररचनेने होणार आहे. २०१९ च्या विधानसभा निवडणुकीसाठी तयार करण्यात आलेल्या मतदार यादीनुसार ही फेररचना करण्यात येणार आहे.
