भाजप प्रदेश महिला आघाडीच्या अध्यक्षा चित्रा वाघ यांचे पतीसह असलेले छायाचित्र मॉर्फ करून ते सोशल मीडियावर व्हायरल करून बदनामी करण्याचा घृणास्पद प्रकार केला जात असून सदर प्रकरणाची सखोल चौकशी करून गुन्हा दाखल करण्यात यावा अशी मागणी भाजपच्या वतीने पंढरपूर शहर पोलीस निरीक्षकांकडे निवेदनाद्वारे करण्यात आली आहे.
राज्यात माता भगिनींवर होत असलेल्या अन्यायाविरोधात भाजपाचे प्रदेश महिला आघाडीच्या अध्यक्षा चित्रा वाघ या संघर्ष करीत आलेल्या नेत्या आहेत.पुरोगामी म्हणून देशात ओळख असलेल्या या महाराष्ट्रात केवळ राजकीय द्वेषातून महिला नेत्यांविरोधात सोशल मिडीयावर अतिशय घृणास्पद टीका टिपण्णी करणे हा प्रकार घडत असतानाच आता त्यांचे छायाचित्र मॉर्फ करून बदनामी केली जात आहे.तरी या प्रकरणी सखोल तपास करून संबंधितावर गुन्हे दाखल करावेत अशी मागणी या निवेदनात करण्यात आली आहे.
या निवेदनावर न.पा.भाजपा पक्षनेते अनिल अभंगराव,पंढरपूर शहर अध्यक्ष विक्रम शिरसट,जिल्हा सरचिटणीस बादल ठाकूर,शहर भाजपा महिला आघाडीच्या अध्यक्षा अपर्णा ताटके,उपाध्यक्षा रेखा कुलकर्णी,प्रदेश कार्यकारिणी सदस्या शकुंतला नडगिरे यांच्या सह्या आहेत.
