फटाक्यांच्या खर्चाला फाटा देऊन ज्येष्ठांना दिल्या भेटवस्तू..
पंढरपूरच्या सोनार बंधूंचा स्तुत्य उपक्रम…
पंढरपूर (प्रतिनिधी) : महाराष्ट्र राज्य शासनाच्या आवाहनास प्रतिसाद म्हणून पंढरपूर येथील साहित्यिक व सामाजिक कार्यकर्ते रवि वसंत सोनार यांच्या परिवारामधील मुलांनी व तरुणांनी फटाक्यांचा खर्च कमी करण्यासाठी संकल्प केला आहे.
याकामी कुमारी रेवती, ओंकार, गौरव आणि अथर्व या सोनार बांधवांनी पुढाकार घेतला. तसेच फटाक्यांसाठी होणाऱ्या खर्चाची रक्कम सामाजिक कार्यासाठी उपयोगात आणण्याचे ठरवले. यासाठीच सामाजिक बांधिलकी जपण्यासाठी म्हणून सोनार बांधवांनी गोपाळपूर येथील मातोश्री वृद्धाश्रमातील ज्येष्ठ नागरिकांना येणाऱ्या दीपावली साठी उपयुक्त असे सुगंधी उटणे, मेण पणती, सुगंधी तेल, अंगाचा साबण, मेंदी, नख पॉलिश या व अशा वृद्धाश्रमातील सर्व ज्येष्ठ नागरिकांना दीपावली साठी उपयोगी वस्तू मातोश्री वृद्धाश्रमाचे समन्वयक धनंजय राक्षे आणि ज्येष्ठ स्त्री-पुरुष यांच्याकडे सुपूर्द केल्या. सोनार बंधूंच्या या उपक्रमामुळे वृद्धाश्रमातील सर्वच ज्येष्ठ स्त्री आणि पुरुष आनंदीत होऊन भारावून गेले.
या स्तुत्य उपक्रमासाठी सोनार बंधूंना श्री. व सौ. सविता रवि सोनार तसेच कवी सचिन कुलकर्णी यांनी मार्गदर्शन केले. सोनार बंधूंच्या या उपक्रमाचे पंढरपूर शहर आणि परिसरात कौतुक होत आहे