एका १५ वर्षांच्या मुलीने आपल्या वाढदिवशी मैत्रिणींसोबत शाळेत मौजमजा केली. घरी येऊन केक कट केला आणि त्यानंतर तिने रात्री गळफास घेत आपलं आयुष्य संपवल्याची हृदयद्रावक घटना घडली आहे. बिहारमधील गोपालगंज येथे ही घटना घडली. याप्रकरणी नातेवाईकांवर आईच्या प्रियकरावर हत्येचा आरोप केला आहे. तर, संशयित आरोपी घटनेनंतर फरार झाला आहे. सध्या पोलिस त्याचा तपास घेत आहेत.
गोपालगंज येथे राहणारी ही अल्पवयीन मुलगी ९ व्या वर्घात शिकत होती. तिने तिच्या वाढदिवशीच इतक्या टोकाचं पाऊल उचलल्याने परिसरात एकच खळबळ माजली आहे. घटनेची माहिती मिळताच पोलिसांनी घटनास्थळ गाठून मृतदेह ताब्यात घेतला आणि शवविच्छेदनासाठी पाठवून दिला.मृत मुलीच्या कुटुंबीयांनी तिच्या आईच्या प्रियकर पंकज कुमारवर मुलीची हत्या करून तिला फासावर लटकवल्याचा आरोप केला आहे. पोलिसांनी घटनास्थळावरून अनेक पुरावे जप्त केले असून, त्याआधारे मृत्यूचे गूढ उकलण्याचा तपास सुरू आहे.
बुधवारी (२५ ऑक्टोबर) विद्यार्थिनीचा वाढदिवस होता. शाळेत तिने तिच्या मैत्रिणींना मिठाई खाऊ घातली आणि घरी आल्यावर तिने केक कापला. सर्व काही सुरळीत सुरू होते, मात्र अचानक विद्यार्थिनीने रात्री गळफास का लावून घेतला याचं गूढ सध्या उलगडलेलं नाही.
