बुलढाणा जिल्ह्यातील शेगाव येथील एका २४ वर्षीय युवकाने आत्महत्या केली. राहत्या घरात फॅनला साडीने गळफास घेऊन तरुणाने आयुष्याची अखेर केली. ही घटना ३ एप्रिल रोजी दुपारी उघडकीस आली .
याबाबत मयत तरुणाचे मामा रतन सिंग पाटील (राहणार वेंकटेश नगर, शेगाव) यांनी शहर पोलीस स्टेशनला माहिती दिली. मी घरी असताना माझा भाचा स्वप्नील पाटील याचे दोन मित्र आमच्या घरी आले. ‘मामा, स्वप्नीलची आई, वडील, भाऊ बाहेरगावी गेले असून आम्ही त्याच्या घरी गेलो, तेव्हा दरवाजा उघडताच स्वप्नीलने घरामध्ये फॅनला साडीच्या सहाय्याने गळफास घेऊन आत्महत्या केल्याचे दिसले’ असे मित्रांनी सांगितल्याचं स्वप्नीलचे मामा म्हणाले. मी स्वप्नीलच्या घरी जाऊन पाहिले असता हा प्रकार खरा असल्याचे आढळल्याचेही त्यांनी सांगितले.
स्वप्नील हा रोकडिया नगर शेगाव येथील रहिवासी होता. खाजगी वाहन चालक अनिल पाटील यांचा तो मोठा मुलगा आहे. स्वप्नील आई, वडील, लहान भाऊ यांच्यासोबत राहत असून ते बाहेर गावी गेले होते. स्वप्नील अमरावती येथील सुपर हॉस्पिटल येथे जनरेटर ऑपरेटर होता.
