शेतात जाणारी वाट आडवल्याच्या रागातून सख्ख्या लहान भावाने आपल्या मोठ्या भावाचा कुऱ्हाडीचा घाव घालून खून केल्याची धक्कादायक घटना बारामती तालुक्यातील मोढवे गावात घडली आहे.
ही घटना शुक्रवारी (दि.12) दुपारी अडीच वाजण्याच्या सुमारास घडली आहे. या घटनेत आरोपी लहान भाऊ जखमी झाला असून त्याच्यावर रुग्णालयात उपचार सुरु आहेत.
पोलिसांनी दिलेल्या माहितीनुसार, तायाप्पा मोटे याने आरोपी धाकटा भाऊ रामाला तु शेतात जाणाऱ्या वाटेवर लाकडाचे ओंडके का टाकले अशी विचारणा केली.त्या कारणावरुन दोघांमध्ये जोराचे भांडण झाले.
त्यावेळी रामा मोटे याने मोठा भाऊ तायाप्पा याला शिवीगाळ करुन दमदाटी करत तु या रस्त्याने जायचे नाही. तुला आता जिवंत सोडणार नाही. तुला खल्लास करतो, असे म्हणून रामा मोटे याने तायाप्पा सोबत वाद घातला. त्यावेळी रामा आणि तायाप्पा यांनी एकमेकांवर कुऱ्हाडीने घाव घालण्यास सुरुवात केली.रामाने तायाप्पा याच्या डोक्यात कुऱ्हाडीने घाव घातले. यामध्ये तायाप्पाचा जागीच मृत्यू झाला.तर रामाच्या पायावर घाव बसल्याने तो गंभीर जखमी झाला आहे.
