पंढरपूर तालुका पोलीस ठाण्यात गुन्हा दाखल
जागेचा वाद,इनोव्हातून पाठलाग करीत मोटारसायकलला पाठीमागून धडक
पंढरपूर तालुक्यातील लक्ष्मी टाकळी येथील हॉटेल वैभवराज या हॉटेलच्या जागा खाली करून जागा मालकाने मागितली म्हणून या हॉटेलचे चालक परमेश्वर देठे याची दोन मुले रणजीत परमेश्वर देठे व प्रशांत परमेश्वर देठे,पुतण्या नितीन दिगंबर देठे,हॉटेल कामगार विजय बलभीम कोळेकर यांनी संगनमताने लक्ष्मी टाकळी येथेच राहणारे या हॉटेलचे जागा मालक प्रतापसिह सर्जेराव पाटील यांचा मुलगा रविकांत प्रतापसिह पाटील याचा इनोव्हा या गाडीतून पाठलाग करत पंढरपूर तालुक्यातील नारायण चिंचोली नजीक असलेल्या हॉटेल पंचरत्न जवळ मोटरसायकल ला पाठीमागून जोरदार धडक देऊन खून केला आहे.
या अपघाताची माहिती मिळताच पंढरपूर तालुका पोलीस ठाण्याचे निरीक्षक मिलिंद पाटील व इतर स्टाफ यांनी घटनास्थळी पोहोचत प्रत्यक्षदर्शी साक्षीदार यांच्याकडून चौकशी केली असता हा अपघात नसून घातपाताचा संशय आल्याने कसून चौकशी केली असता मयताच्या हालचालीवर लक्ष ठेवून पाठलाग करून खून केला असल्याचे उघड झाले आहे.
मयत रविकांत याचे वडील प्रतापसिह सर्जेराव पाटील यांनी दाखल केलेल्या फिर्यादीनुसार या प्रकरणी वरील आरोपीवर १२० ब,३०२,३४ कलमानुसार गुन्हा दाखल करण्यात आला आहे.
