महिनाभरापूर्वी मुंबईतील सांताक्रूझ येथून बेपत्ता झालेल्या 29 वर्षीय तरुणीच्या हत्येचं गूढ उलगडण्यात पोलिसांना यश आलं आहे.
या प्रकरणी पोलिसांनी विले पार्लेतून तिच्या प्रियकराला आणि एका साथीदाराला अटक केली आहे. आरोपी प्रियकराला अटक केल्यानंतर त्यानं गुन्ह्याची कबुली दिली असून प्रेयसी सतत महागडे गिफ्ट्स आणि फिरायला घेऊन जाण्याचा हट्ट करत होती. त्यामुळे तिची हत्या केल्याचं आरोपीनं सांगितलं आहे. आरोपीला सध्या पालघर पोलिसांच्या ताब्यात देण्यात आलं असून घटनेचा पुढील तपास पोलीस करत आहेत.
पिंकी क्लिफॉर्ड मिस्क्वित्ता असं हत्या झालेल्या 29 वर्षीय तरुणीचं नाव आहे. तर झिको अंसलिम मिस्कित असं अटक केलेल्या 27 वर्षीय तरुणाचं नाव आहे. या प्रकरणी पोलिसांनी आरोपीला मदत करणाऱ्या कुमार नावाच्या मित्राला देखील ताब्यात घेतलं आहे. पोलिसांनी दिलेल्या माहितीनुसार, मृत पिंकी 24 डिसेंबर रोजी सांताक्रूझ येथून बेपत्ता झाली होती.
त्या प्रकरणी सांताक्रूझ पोलीस ठाण्यात फिर्याद दाखल करण्यात आली होती. तेव्हापासून सांताक्रूझ पोलिसांसह गुन्हे प्रकटीकरण शाखेच्या कक्ष 9 अधिकारी या गुन्ह्याचा तपास करत होते.
