नगर शहरातील तारकपूर भागात सोमवारी दुपारी एक खळबळजनक घटना घडली. पेटलेल्या अवस्थेत एका महिलेने घराच्या गच्चीवरून उडी घेतली. पोलिसांनी घटनास्थळी धाव घेतली असून तिला रुग्णालयात हलविण्यात आले आहे.
पूजा मनोहर चुग (वय ३३ रा. तारकपूर) असे या महिलेचे नाव आहे. दुसऱ्या मजल्यावरून पडल्यामुळे यांच्या डोक्याला मार लागला आहे. भाजल्याने जखमाही झाल्या आहेत. त्यांच्यावर जिल्हा रुग्णालयात उपचार सुरू आहेत. मात्र चुग यांनी पेटवून का घेतले? याबाबत अद्याप माहिती मिळाली नाही.
तारकपूर भागातील एका घरावरून पूजा यांना पेटलेल्या अवस्थेत खाली पडताना अनेकांनी पाहिले. त्यावेळी त्या जोरजोरात ओरडत होत्या, असे प्रत्यक्षदर्शींनी पोलिसांना सांगितले. गजबजलेल्या तारकपूर भागात भर दुपारी ही घटना घडल्याने खळबळ उडाली आहे. या प्रकरणी तोफखाना पोलीस अधिक तपास करत आहेत.
