उत्तर प्रदेशमधील औरिया जिल्ह्यात एका लग्नादरम्यान विचित्र प्रकार घडला. नवऱ्याने वरमाला नवरीवर फेकल्याने संतापलेल्या नवरीने लग्नच मोडले आहे. कुटुंबीयांनी नवरीला समजवायचा बराच प्रयत्न केला मात्र ती लग्न न करण्याच्या निर्णयावर ठाम राहिली.
औरिया जिल्ह्यातील नवीन बस्ती भागात आकाश व रसिका (नवरीचे नाव बदलले आहे) यांचे लग्न होणार होते. लग्नाच्या विधी सुरू असताना आकाशने मस्करीत रसिकावर वरमाला फेकली.
मात्र भर मांडवात आपल्यासोबत घडलेला प्रकार नवरीला सहन झाला नाही. तिने ती वरमाला बाजूला ठेवत तेथून थेट खोलीत निघून गेली. त्यानंतर रसिकाचे आई वडिल व नातेवाईक तिला मांडवात परत आणायला गेले तेव्हा तिने लग्न करण्यास नकार दिला.
घरातल्यांनी बरीच समजूत काढूनही रसिका ऐकली नाही. ती लग्नाला तयार होत नसल्याने आकाशला तसेच घरी परतावे लागले.