स्वबळावर नगरसेवक होण्याचे स्वप्न पाहणाऱ्या व कुठलीही राजकीय बांधिलकी न मानता केवळ आपण आपल्या भागात केलेल्या जनसेवेचे बळावर नगरसेवक होण्याचे स्वप्न पाहणाऱ्या अनेक भावी नगरसेवकांना पंढरपुर सह राज्यातील सर्वच नगर पालिका निवडणुका एक सदस्यीय वार्ड रचनेनुसार होणार असल्याने मोठा दिलासा मिळाला होता.दोन ते अडीच हजार मतदार संख्येचे वार्ड तयार केले जातील अशी अपेक्षाही होती.बहुसदस्यीय प्रभाग रचनेत बड्या नेत्याच्या आशिर्वादा शिवाय कार्यक्षेत्राबाहेरील मतदारांना सामोरे जावे लागत होते.तर आर्थिक तरतूदही मोठी करावी लागत होती.त्यामुळे फेब्रुवारी २०२० रोजी एक सदस्यीय वार्ड रचनेचा निर्णय राज्य शासनाने घेतल्यानंतर अनेकांनी पालिका निवडणूक लढविण्याची आत्मविश्वासाने तयारी केली होती.मात्र आज राज्य मंत्रिमंडळाच्या बैठकीत राज्यातील नगर पालिकांच्या आगामी निवडणूका या व्दि सदस्यीय प्रभाग पद्धतीने घेण्याचा निर्णय घेत महाविकास आघाडी सरकारने पक्ष विरहित व स्वबळावर राजकीय वाटचाल करू पाहणाऱ्या समाजसेवकांचा भ्रमनिरास केला आहे.
निवडणुकीच्या पार्श्वभूमीवर ठाकरे सरकारने मोठा निर्णय घेतला आहे. मुंबई वगळता इतर सर्व महापालिकांच्या निवडणुकीत 3 सदस्यीय प्रभाग पद्धत असेल, तर मुंबईत एक वॉर्ड पद्धत असेल. पण 2 सदस्यीय प्रभाग पद्धत नगरपालिका आणि नगरपरिषदेत असेल. नगरपंचायतीलाही 1 सदस्यीय पद्धत असेल. गेल्या काही काळापासून वॉर्ड तसच प्रभाग पद्धतीवर मोठे राजकारण सुरु आहे. त्याच पार्श्वभूमीवर आजच्या कॅबिनेट बैठकीत हा निर्णय घेण्यात आला.
दरम्यान काही नेत्यांची पुणे, पिंपरी-चिंचवड, सोलापूर, कोल्हापूर यासह काही महानगरपालिकेत दोन सदस्य प्रभाग पद्धत रहावी, अशी काही नेत्यांची भूमिका आहे. नगरपंचायतीत एक सदस्य प्रभाग पद्धत, तर नगरपालिकांमध्ये दोन सदस्य प्रभाग पद्धत असण्याची शक्यता वर्तवण्यात येत होती. आगामी महापालिकेच्या निवडणुका सध्या अस्तित्वात असलेल्या प्रभाग रचनेनुसार होणार की वॉर्डप्रमाणे याबाबत अनेक दिवस अनिश्चितता होती. याबाबत सरकार ऐन वेळेवर निर्णय घेऊ शकते, असे राजकीय पक्षांचे मत होते. दरम्यान, शहरांचा विस्तार वाढल्यामुळे सीमालगतचा भाग शहरात समाविष्ट केल्यास वॉर्डाची संख्या वाढू शकते. असे झाल्यास नव्याने वॉर्ड किंवा प्रभाग रचना केली जाण्याची शक्यता असते.
