जुन्नर येथे तलाठी असणाऱ्या पतीने झोपलेल्या पत्नीच्या डोक्यात हातोडा मारून तसेच चाकूने वार करून निर्घृण खून केला. मोशीतील बोऱ्हाडेवस्ती परिसरात सोमवारी (दि.6) सकाळी ही धक्कादायक घटना उघडकीस आली.खून केल्यानंतर आरोपी पती फरार झाला आहे. सरला विजयकुमार साळवे (वय (32, रा.मोशी) असे खून झालेल्या पत्नीचे नाव आहे. विजयकुमार साळवे (वय 34, रा.मोशी) असे आरोपी पतीचे नाव आहे.
वरिष्ठ पोलीस निरीक्षक शिवाजी गवारी यांनी दिलेल्या माहितीनुसार, आरोपी विजयकुमार साळवे हा जुन्नर येथे तलाठी आहे. मागील दोन वर्षांपूर्वी सरला आणि विजयकुमार यांचा प्रेमविवाह झाला आहे. ते दोघेही विदर्भातील असून मोशी येथे भाड्याच्या घरात राहत होते. दरम्यान चारित्र्याच्या संशयावरून विजयकुमार आणि सरला यांच्यात वाद नेहमी होत असे.
दरम्यान रविवारी रात्री सरला झोपल्या असताना विजयकुमार याने त्यांच्या डोक्यावर हातोड्याने प्रहार केला. त्यानंतर चाकूने भोकसून निर्घृण खून केला. घटनेनंतर विजयकुमार फरार झाला. दरम्यान विजयकुमार आणि सरला दोघांच्याही ओळखीचा असणाऱ्या मित्राने त्यांना फोन केला. दोघेही फोनला उत्तर देत नसल्याने त्यांच्या घरी आला. घर बंद असल्याने मित्राला संशय आला.
त्याने याबाबत पोलिसांना माहिती दिली. पोलिसांनी घटनास्थळी धाव घेत दरवाजा उघडला असता आतमध्ये सरला या रक्ताच्या थारोळ्यात पडलेल्या दिसून आल्या. या प्रकरणी एमआयडीसी भोसरी पोलीस ठाण्यात रात्री उशिरापर्यंत गन्हा दाखल करण्याचे काम सुरू होते.
