गुन्हेगारी प्रवृत्तीचा शिरकाव कधी कुठे आणि कुणाच्या कुटूंबात कुठल्या करणाने होईल याची आता शाश्वती राहिली नाही.एकीकडे आपला जीव धोक्यात घालून पोलीस दलातील अनेक प्रामाणिक कर्मचारी आपले कर्तव्य बजावत असलेले दिसून येतात तर त्याच वेळी राज्यात काही पोलीस ठाण्यात थेट गुन्हेगारांना सन्मानाची वागणूक देत त्यांचा वाढदिवस साजरा केला जातो अशा घटना घडताना दिसून येतात.तर काही गुन्ह्यामध्ये थेट पोलीस कर्मचाऱ्यांचा सहभाग वेळावेळी आढळून आला आहे.
आता भामरागड तालुक्यातील पोलीस दलात अशीच एक घटना घडली आहे.येथे कार्यरत असलेले पोलीस हवालदार जगन्नाथ सिडाम 53 यांची 4 जुलै रोजी रात्रीच्या सुमारास नागेपल्ली येथील त्यांच्या निवासस्थानी हत्या करण्यात आल्याची घटना घडली होती.या हत्याकांडाचा उलगडा पोलीस चौकशीवरून झाला असून पोलीस हवालदार सिडाम यांच्या हत्या प्रकरणात त्यांची पत्नी व मुलीचा सहभाग असल्याची धक्कादायक माहिती उजेडात आली आहे. सुपारी किलरद्वारे सिडाम यांची हत्या करण्यात आली आहे. याप्रकरणात पोलीसांनी मृतकाची पत्नी, मुलगी आणि एका आरोपीला अटक केली आहे. या प्रकरणात आणखी दोन आरोपीचा सहभाग असून त्यांचा शोध सुरू असल्याची माहिती प्रकरणाचे तपास करणारे उपविभागीय पोलीस अधिकारी विशाल ठाकूर यांनी दिली आहे.
