जालना – जालना जिल्ह्यातील भोकरदन तालुक्यात एका मुलीने लग्नाच्या दिवशीच आपल्या प्रियकरासोबत आत्महत्या केली होती. ही घटना ताजी असतानाच आणखी एका युवकाने प्रेम प्रकरणात आई-वडिलांचा झालेला अपमान जिव्हारी लागल्याने आत्महत्या केली आहे. भोकरदान तालुक्यातील वालसावंगी शिवारात ही घटना घडली.
वालसंगी शिवारात तरुणानं झाडाला गळफास घेत आत्महत्या केली. त्यापूर्वी त्यानं फेसबूक लाईव्हवर व्हिडिओ करत आत्महत्या करत असल्याचं सांगितलं. आत्महत्येसाठी कोणालाही जबाबदार ठरवू नये असही त्याने व्हिडिओत म्हटलं आहे.
सिल्लोड तालुक्यातील हत्ती बाहुली गावातील एकवीस वर्षीय तरुण सुमीत किशोर पारधे या तरुणाचे प्रेम प्रकरणातून वाद झाले होते.
या वादातून त्याच्या आई वडिलांवर माफी मागण्याची वेळ आली होती. आई वडिलांचा झालेला हा अपमान सुमीतच्या जिव्हारी लागला होता. आई वडिलांची इज्जत आपण धुळीत मिळवली या अपराधी भावनेनं सुमीतनं आत्महत्या केली.
सुमीत वालसावंगी गावातील नातेवाईकांना भेटण्यासाठी जात होता. मात्र रस्त्याने जात असताना त्याची गाडी पंक्चर झाली होती. तेव्हा सुमीतच्या साथीदार गाडी पंक्चर काढण्यासाठी गेला. तर सुमीत गोळी आणायची सांगून वालसावंगी शिवारातील वनीकरण विभागाच्या झुडपात गेला. तिथेच त्याने गळफास घेऊन आत्महत्या केली.
