औरंगाबादमध्ये महापालिकेच्या कोरोना उपचार केंद्रात कार्यरत असलेल्या डॉक्टरने कोरोनाबाधित महिलेकडे शरीर सुखाची मागणी केल्याचा आरोप करण्यात आला आहे. रुग्णाच्या संतप्त नातेवाईकांनी या प्रकारानंतर रुग्णालयात शिरून डॉक्टरला बेदम मारहाण केली. महिलेकडे शरीरसुखाची मागणी करणाऱ्या डॉक्टरची हकालपट्टी करण्याचा निर्णय घेतल्याची माहिती महानगरापालिका आरोग्य अधिकारी नीता पडळकर यांनी दिली आहे.
दोन दिवसांपूर्वी एक महिला पदमपुरा येथील कोरोना उपचार केंद्रात रुग्ण दाखल झाली. एक आयुष डॉक्टर या महिलेचा मोबाईल नंबर घेऊन तिला सतत फोन करीत होता. डॉक्टरने मंगळवारी रात्री दोन वाजता या महिलेकडून शरीर सुखाची मागणी केली. तिला गच्चीवर नेण्याचा प्रयत्न केला. महिलेने त्याला विरोध करत आरडाओरड केल्यामुळे कोविड केअर सेंटरमध्ये एकच गोंधळ उडाला. इतर कर्मचाऱ्यांनी धाव घेऊन मध्यस्थी केली. पीडित महिला रुग्णालयात रडत होती.
नातेवाईकांना घटनेची माहिती मिळाली. रुग्णालयात शिरून त्या डॉक्टरला नातेवाईकांनी बेदम मारहाण केली. बुधवारी झालेला प्रकार प्रशासक आस्तिककुमार पाण्डेय यांना कळला. त्यांनी या प्रकरणाची तातडीने चौकशी करून अहवाल गुरुवारी सकाळपर्यंत सादर करावा, असे आदेश दिले. विशेष म्हणजे या प्रकाराबाबत पोलिसात कोणतीही तक्रार दाखल करण्यात आलेली नाही.
