शिवसेनेने भाजपात गेलेल्या नाईक गटाचे नगरसेवक फोडल्याने गणेश नाईक यांच्या जिव्हारी लागले असून आपल्या समर्थकासमोर बोलताना त्यांनी घाबरू नका,इंटरनॅशनल डॉन माझ्या ओळखीचे आहेत ! असे विधान केल्यामुळे खळबळ उडाली आहे.
यावर शिवसेनेने देखील लगेचच प्रत्यूत्तर दिले असून गणेश नाईक इंटरनॅशनल डॉन असतील तर आम्ही नवी मुंबईत डॉन आहोत, असे शिवसेना नगरसेवक विजय चौगुले यांनी म्हटले आहे.
नवी मुंबई महानगर पालिकेत गेल्या काही दिवसांपासून भाजपाच्या नगरसेवकांची गळती सुरू झाली आहे.गणेश नाईक समर्थक असलेल्या 14 नगरसेवकांनी आतापर्यंत भाजपाला सोडचिठ्ठी देत शिवसेना आणि राष्ट्रवादी पक्षात प्रवेश केला आहे.भाजपच्या कार्यक्रमात गणेश नाईक बोलत होते. कोणत्याही गुंडगिरीला घाबरु नका. रात्री अपरात्री मला कधीही फोन करा. इथलेच काय इंटरनॅशनल डॉन सुद्धा मला ओळखतात असे वादग्रस्त विधान करीत गणेश नाईक यांनी आपल्या समर्थकांना धीर देण्याचा प्रयत्न केला असला तरी आता त्यांच्या या विधानाचे पडसाद राज्यात उमटणार असून साधन शुचितेचे महत्व सांगणाऱ्या भाजपाच्या राज्याच्या नेत्याकडून आता काय प्रतिक्रया व्यक्त होतात याकडे राज्याच्या जनतेचे लक्ष लागले आहे.