अबंड शहरातील भालगाव रोड फकरबाद नाल्याजवळ काल ३ जानेवारी रोजी दुपारी १९ वर्षीय नारायण लिबांजी बाबर या तरुणाचा मृतदेह आढळल्याने एकच खळबळ उडाली होती. नारायण बाबर हा २ जानेवारी पासून बेपत्ता झाला होता. नारायण शिंदे नगर भागातील त्याच्या घरी असताना दुपारी तीन वाजेच्या सुमारास नारायणच्या मोबाईलवर एक कॉल आला होता. नारायणने तो कॉल उचलला आणि बोलत बाहेर निघाला तो परत घरी आलाच नाही.
बराच वेळ झाला तरी नारायण घरी न आल्याने घरच्यांनी त्याच्या मोबाईलवर संपर्क साधण्याचा प्रयत्न केला. पण त्याचा मोबाईल बंद दाखवत होता. दरम्यान २ जानेवारीला संध्याकाळी पाच वाजेच्या जवळपास नारायणचा मोबाईल बंद होऊन संपर्क होतच नसल्याने घरचे काळजीत पडले होते. अखेर त्यांनी अबंड पोलीस स्टेशन गाठत पोलीस स्टेशनमध्ये नारायण बेपत्ता असल्याची नोंद केली होती. नातेवाईक आणि घरच्यांनी त्याचा शोध घेणे सुरूच ठेवले. मित्रांना विचारपूस केली परंतु यश मिळाले नाही. काल दुपारी घरापासून थोड्या अंतरावर असलेल्या फकरबाद नाल्याजवळ नारायणचा मृतदेह सापडल्याने एकच खळबळ उडाली.
मात्र हा घातपाताचा प्रकार असून पोलिसांनी खुनाचा गुन्हा दाखल करावा यासाठी नातेवाईकांनी नारायणचा मृतदेह रुग्णवाहिकेत टाकू थेट अबंड पोलीस ठाण्यात आणला. जोपर्यंत खुनाचा गुन्हा दाखल होत नाही तोपर्यंत मृतदेह अबंड पोलीस ठाण्यासमोरुन घेऊन जाणार नाही. तसेच अंत्यसंस्कार करणार नाही, अशी आक्रमक भूमिका नातेवाईकांनी घेतली. या प्रकरणी अबंड पोलीस ठाण्यात खुनाचा गुन्हा दाखल करण्याची प्रक्रिया चालू झाली होती.
