मोर्शी मुलगा आणि सुनेच्या भांडणात आई मध्यस्थी करायला गेली. त्यावेळी मुलाने रागाच्या भरात आईच्याच छातीत लोखंडी सळाख भोसकून तिची हत्या केली. ही धक्कादायक घटना शहरातील गाडगेनगर परिसरात घडली. या प्रकरणी आरोपी मुलास अटक करण्यात आली आहे.
मिळालेल्या माहितीनुसार, सीताकौर रमेशसिंग बावरी (५०) रा. गाडगेनगर असे मृतक तर नरसिंग रमेशसिंग बावरी (३५) रा. गाडगेनगर असे आरोपीचे नाव आहे. नरसिंग हा पत्नी रजनी (२८) यांना नेहमी मद्यप्राशन करून छोट्या-मोठ्या कारणावरून शिवीगाळ आणि मारहाण करत होता. आल्यावर जेवणातील भाजीच्या कारणावरून पत्नी रजनी यांच्यासोबत वाद घातला. या वादात त्याने रजनी यांना मारहाण केली. इतकेच नव्हे, तर घरातील लोखंडी सळाख हातात घेऊन तुला आज मारूनच टाकतो, असे म्हणत तो त्यांच्या अंगावर धावून गेला. त्यामुळे त्याची आई सीताकौर ह्या भांडणात मध्यस्थी करायला गेल्या.
त्यावर नरसिंगने आई सीताकौर यांच्या छातीत लोखंडी सळाख भोसकून त्यांची हत्या केली. ही बाब शेजारी राहणाऱ्या नागरिकांच्या लक्षात आल्यावर सीताकौर यांना रक्तबंबाळ अवस्थेत उपजिल्हा रुग्णालयात दाखल करण्यात आले. मात्र, उपचारादरम्यान त्यांचा मृत्यू झाला. या प्रकरणी रजनी यांनी मोर्शी ठाण्यात तक्रार दाखल केली. तक्रारीवरून पोलिसांनी आरोपी नरसिंगविरुद्ध खुनाचा गुन्हा दाखल करून त्याला अटक केली. पुढील तपास ठाणेदार श्रीराम लांबाडे यांच्या मार्गदर्शनाखाली पोलीस उपनिरीक्षक स्वप्निल रणखांब करीत आहेत.
