‘घर का भेदी लंका ढाये’, या म्हणीला खरं ठरवत नागपुरातील एका विवाहित महिलेने प्रियकराला टीप देऊन स्वतःच्या घरात 14 लाखाची चोरी करवून घेतली. या चोरी प्रकरणी पोलिसांनी या महिलेच्या मुसक्या आवळल्या आहेत. आता या पत्नीला तुरुंगाची हवा खावी लागत आहे.
नागपूरच्या सदर पोलीस स्टेशन हद्दीत राहणाऱ्या सुमित यादव यांच्याकडे चोरी झाली. यात सोन्याच्या चांदीच्या दागिन्यासह जवळपास 14 लाखांचा मुद्देमाल चोरी गेला. पोलिसांनी घटनेचा तपास सुरू करत घरातील सगळे सीसीटीव्ही तपासले आणि हळूहळू चोरीचा गूढ उलगडत गेलं.
पोलिसांना सुरूवातीपासूनच फिर्यादीच्या पत्नीवर संशय वाटत होता. मात्र, त्यांना पुरावा मिळत नव्हता. पोलिसांनी घटनेचा बारीक तपास केला. तेव्हा पुढे आलं की घटनेच्या दिवशी पत्नी आपल्या पतीला बाहेर घेऊन गेली.
प्लाननुसार चोराला म्हणजे पत्नीच्या आधीच्या प्रियकराला त्याला घरात कुठे काय ठेवलं आहे, त्याची सगळी माहिती दिली होती. प्लाननुसार हे दोघे बाहेर जाताच तो घरात शिरला आणि काही वेळात ठरल्याप्रमाणे त्याने सगळं मुद्देमाल घेऊन लंपास झाला.
मात्र, सीसीटीव्हीमध्ये तो छत्री घेऊन जाताना दिसला. त्यावरून पोलिसांनी त्याचा शोध सुरू केला. त्यानंतर रामटेक तालुक्यातील त्याच्या घरी पोहचले. पोलिसांनी त्याच्या घराची झडती घेतली असता सोन्या-चांदीचे दागिने आढळले. मात्र या महिलेचा प्रियकर रोख पैसे घेऊन पळण्यात आरोपी यशस्वी झाला.
