हॉटेलच्या खोलीत एका वकिलाचा मृतदेह आढळल्याने परिसरात खळबळ उडाली आहे. मृतदेहाजवळून एक सुसाईड नोटही सापडली आहे. बिहारच्या दरभंगा येथे ही धक्कादायक घटना घडली आहे. येथील लहेरियासराई पोलीस स्टेशन हद्दीतील व्हीआयपी रोडवर असलेल्या हॉलिडे इन हॉटेलच्या खोलीतून सापडलेला मृतदेह हा वकील मंजन कुमार झा ऊर्फ मोहन झा (वय-२८) यांचा आहे. पोलिसांनी मृतदेह ताब्यात घेऊन शवविच्छेदनासाठी पाठवला आहे.
प्रकरणाची माहिती मिळताच वकिलाचे कुटुंबीय दरभंगा येथे पोहोचले. तेव्हा न्यायदंडाधिकारी आणि कुटुंबीयांसमोरच ती खोली उघडण्यात आली. या वकिलाचा मृतदेह बेडवर झोपलेल्या अवस्थेत आढळून आला आहे.
याप्रकरणी सदर एसडीपीओ अमित कुमार आणि पोलिस स्टेशनचे अध्यक्ष कुमार कीर्ती हे तात्काळ घटनास्थळी पोहोचले आणि त्यांनी हॉटेलच्या खोलीचा पूर्ण आढावा घेतला. याप्रकरणी एसडीपीओ म्हणाले की, प्रथमदर्शनी ही आत्महत्या असल्याचे दिसते. पोस्टमॉर्टम रिपोर्ट आल्यानंतरच मृत्यूचं नेमकं कारण सांगता येईल. तसेच, या मृतदेहाच्या बाजूला एक सुसाईड नोटही जप्त करण्यात आली असून, त्याचा तपास सुरू आहे. पोलिस याप्रकणी सर्व बाजूंनी तपास करत आहेत. माहिती मिळताच दरभंगा येथे पोहोचलेल्या मृत वकिलाचे भाऊ, काका आणि मामा यांना या घटनेने मोठा धक्का बसला आहे.
