प्रेयसी फोन उचलत नाही म्हणून प्रियकर तापला, रस्त्यात गाठलं अन् विषारी औषध पाजलं

February 1, 2023 8:08 pmFebruary 1, 2023 10:06 pm Team : aaplapandharpur.com Comment(0)

वर्धा जिल्ह्यातील हिंगणघाट येथे विषारी औषध पाजून १९ वर्षीय प्रेयसीला ठार मारण्याचा प्रयत्न केल्याची धक्कादायक घटना समोर आली आहे. प्रेयसी फोन उचलत नाही, बोलत नाही या गोष्टीचा राग मनात धरून २२ वर्षीय तरुणाने हे कृत्य केलं. इतकंच नाही तर त्याने स्वत: देखील विषारी औषध घेऊन स्वत:ला संपवण्याचा प्रयत्न केला. या घटनेनंतर दोघांनाही उपचारांसाठी सेवाग्राम रुग्णालयात दाखल करण्यात आलं आहे. अमन निखार (वय २२) असं आरोपीचं नाव आहे. शनिवारी ही घटना घडली होती.

अमनने तरुणीला भेटण्यासाठी बोलावलं होतं. परंतु, ती सातत्याने नकार देत होती. त्यातच ती मागील आठवड्यात काही कामानिमित्त मैत्रिणीसोबत घराच्या बाहेर पडली. तरूणी कलोडे मंगल कार्यालय परिसरात आली असता या आरोपीने तिला वाटेत गाठलं. त्यानंतर तिला जबरदस्तीने आपल्या गाडीवर बसवून निर्जनस्थळी नेलं. माझ्याशी बोलत नाहीस या कारणावरुन आरोपीने तरुणीसोबत वाद घालण्यास सुरुवात केली.

वाद वाढला आणि रागाच्या भरात त्याने आपल्यासोबत आणलेलं विषारी औषध तिला बळजबरीने पाजलं. दरम्यान, तरुणाने देखील विषारी औषध पीत स्वत:ला देखील संपवण्याचा प्रयत्न केला. दोघांनाही सेवाग्राम रुग्णालयात उपचारासाठी दाखल करण्यात आलं आहे. मात्र, दोघांची प्रकृती चिंताजनक आहे, अशी माहिती हिंगणघाटचे पोलीस निरीक्षक कांचन पांडे यांनी दिली.

पीडितेची तक्रार आणि वैद्यकीय अहवालानंतर पोलिसांनी माथेफिरु तरुणावर गुन्हा दाखल केला आहे. हिंगणघाट येथील ज्ञानेश्वर वॉर्डात राहणाऱ्या आरोपी अमन निखार याच्यावर गुन्हा दाखल करण्यात आला आहे. या प्रकरणी हिंगणघाट पोलिसांनी तरुण अमन याच्याविरुद्ध कलम ३०७, ३२८, ३०९ अन्वये गुन्हा दाखल केला आहे. पुढील तपास हिंगणघाट पोलीस करत आहेत.