वाद मिटवण्यासाठी आलेल्या पोलिसांवर देखील हल्ला
अकोला शहरातील हरिहर पेठ भागात आज रविवारी सकाळी ११ वाजता दोन गटात हाणामारी सुरू आहे, अशी माहिती जुने शहर पोलिसांना मिळाली. पोलीस तातडीनं घटनास्थळी दाखल झाले. शिवसेना ठाकरे गटाचे अकोला महानगराध्यक्ष राजेश मिश्रा आणि प्रवीण अहीर गटात किरकोळ कारणावरून तुफान हाणामारी झाली. या हाणामारी दरम्यान अनेकांच्या हातात लाठ्या काठ्या, लोखंडी पाईप, तलवार देखील होती. यामध्ये राजेश मिश्रा यांच्या नाकाला आणि हाताला दुखापत झाली असून त्यांच्यावर उपचार सुरू असून अन्य एक जण जखमी झाला आहे. तर अहीर गटातील दोन ते तीन लोक जखमी झाले. इतकंच नव्हे तर वाद मिटवण्यासाठी आलेल्या पोलिसाला देखील लाठी बसली. पोलीस कॉन्स्टेबल शेख रशीद यांच्या डोक्यावर लाठी बसली. तर पोलीस निरीक्षक सेवानंद वानखडे यांचा चष्माही या घटनेत तुटला आहे. पोलिसांनी वेळीच घटनास्थळी हजेरी लावल्याने मोठी दुर्घटना टळली आहे. दरम्यान, या प्रकरणात आतापर्यंत पाच ते सहा लोकांना ताब्यात घेतले असून जूने शहर पोलीस ठाण्यात दंगलीचे गुन्हे दाखल करण्याची प्रक्रिया सुरू आहे.