विरोधी पक्षनेते देवेंद्र फडणवीस यांनी कोथरूड पोलिस ठाण्यात दाखल असलेल्या गुन्ह्यांतील आरोपींचे संबंध थेट गँगस्टर दाउद इब्राहिमच्या साथीदारांशी असल्याचे विधानसभेतच उलगडून दाखविल्यानंतर पुणे पोलिसांत खळबळ उडाली आहे. या गुन्ह्याची गोपनीय कागदपत्रे फडणवीस यांच्या हातात कशी पोहोचली, याची चौकशी सुरू झाली असून, पुणे पोलिस दलातील एका वरिष्ठ पोलिस अधिकाऱ्याला नोटीस बजावण्यात आली आहे.
कोथरूड पोलिस ठाण्यातील एका साध्या गुन्ह्याच्या तपासात आठ राज्यांत सुरू असलेला गंभीर प्रकार उघडकीस आला. पुणे पोलिसांकडून या तपासाला वेगही आला होता. मात्र, अचानक हा तपास थांबला असून, या गुन्ह्याचा ‘क्लोजर रिपोर्ट’ तयार होत असल्याचा धक्कादायक आरोप फडणवीस यांनी विधानसभेत केला आहे. फडणवीस यांच्या आरोपांच्या फैरीनंतर पुणे पोलिस दलात अनेक जण घायाळ झाले असून, पुणे पोलिसांची गोपनीय कागदपत्रे फडणवीस यांच्या हातात कशी पोहोचली, याची चौकशी सुरू करण्यात आल्याचे उच्चपदस्थ सूत्रांनी सांगितले.
फडणवीस यांनी विधानसभेत दिलेल्या माहितीनुसार, पुण्यातील एका प्रख्यात महाविद्यालयात प्रवेशाच्या बहाण्याने फसवणूक झाल्याप्रकरणी कोथरूड पोलिस ठाण्यात पाच सप्टेंबर २०२० रोजी एक गुन्हा उघडकीस आला. या गुन्ह्यातील अंबर आणि त्याचा साथीदार शफिक अन्सारी हे दोघे सध्या ठाणे तुरुंगात दुसऱ्या गुन्ह्यात गजांआड आहेत. अंबर हवाला एजंट असून, दाउदसाठी ‘मनी लाँडरिंग’ करणारा हलन अलीबाबाशी त्याचे जवळचे संबंध आहेत.
अंबरची टिया सुनार नावाची गर्लफ्रेंड असून, ती मूळ जम्मूची आहे. तिच्याकडे देशात राहण्यासाठीची वैध कादगपत्रे नाहीत. ती १९९०पासून बनावट कागदपत्रांच्या आधारे राहते. आंध्र प्रदेश आणि बंगालमध्ये एजंट नियुक्त करण्याचे काम ती करते. तिच्या बँक खात्यातून अनेकांना पैसे ‘ट्रान्स्फर’ झाल्याची कबुली तिने दिली आहे. यासोबत नीलेश शेट्टी नावाचा बारमालक असून, त्याचे टिया सुनारशी जवळचे संबंध आहेत. विक्रम मलकानी आणि डॉन ब्रिगेंझा आणि इतरांच्या माध्यमांतून त्यांचे रशियन आणि युक्रेनियन टोळ्यांशी संबंध असल्याचा आरोप फडणवीस यांनी विधानसभेत केला.
या प्रकरणात अर्पित चतुर्वेदी हा आणखी एक संशयित असून, पुण्यातून त्याने आपले बस्तान नोएडाला हलविले आहे. त्याचे ‘एटीएम’चे लोकेशन पाहता अल्पसंख्याक भागात तो ‘कॅश डिपॉझिट’ करतो. त्याच्या ‘कॉल डिटेल्स’वरून तो घाना, बेल्जियम येथे संपर्कात आहे. यात बिहारमधील प्रत्युक्ष सिंग हा आणखी एक दुवा आहे. त्याचे नेपाळ, पिपरिया, बंगालची सीमा येथे संबंध असून, तो नेपाळला नेमाने प्रवास करतो.
तो निशा सिंग आणि फराक काझीच्या संपर्कात आहे. जम्मू काश्मीरमध्ये ‘ऑपरेट’ करणारी ३५ लोकांची ‘लिंक’ आहे. निखिल कासबे हा व्यावसायिक ‘हॅकर’ असून, तो बँकेत ‘केवायसी’, इलेक्ट्रॉनिक पुरावे नष्ट करणे, ‘डार्क नेट’चा वापर करणे अशी कामे तो करतो. यांची लिंक दाउदसाठी काम करणारा सलीम मर्चंटपर्यंत पोहोचत असल्याचा आरोप फडणवीस यांनी केला आहे.
ही एक ‘प्रोफेशनल गँग’ असून त्यांचे तीनशे सदस्य आहेत. ते आठ राज्यांत काम करतात. ‘नार्कोटिक्स’, ‘सेक्स ट्रॅफिकिंग’, ‘टेरर फंडिंग’ची कामे ते करतात. वेगवेगळ्या बँकांत मृत व्यक्तींची अकाउंट शोधणे, त्यांची वेगवेगळी ओळखपत्रे तयार करणे आणि या खात्यांमध्ये पैसे जमा करणे अशी कामे करतात. त्याच दिवशी जम्मू-काश्मीर किंवा बंगालमध्ये दुसऱ्या खात्यातून हे पैसे काढले जात असल्याचा धक्कादायक आरोप फडणवीस यांनी केला आहे.
तपास का थांबला?
पुणे पोलिसांच्या तपासात हे सर्व निष्पन्न झाल्यानंतर एका क्षणी १०० लोकांना अटक करायची तयारी पुणे पोलिसांनी केली होती. मात्र, अचानक हा तपास थांबला आणि आता या गुन्ह्याचा ‘क्लोजर रिपोर्ट’ तयार होत आहे, असा आरोप फडणवीस यांनी केला. पोलिसांनीच पोलिसांसाठीच तयार केलेल्या ‘रिपोर्ट’मध्ये हे सर्व निष्पन्न झाले आहे. ही केस ‘एनआयए’कडे तपासासाठी दिली पाहिजे. पुणे पोलिस चांगले काम करीत असताना हा तपास का थांबविण्यात आला, असा सवालही फडणवीस यांनी विधानसभेत केला.
