लोकसभेच्या एका आणि विधानसभेच्या 4 जागांसाठी 12 एप्रिलला पोटनिवडणूक होणार आहे. त्यात पश्चिम बंगालमधील आसनसोल लोकसभा जागेचा समावेश आहे. ही जागा बाबुल सुप्रियो यांच्यामुळे रिक्त झाली आहे.
गेल्या वर्षी बाबुल सुप्रियो यांनी आपल्या लोकसभेच्या जागेचा राजीनामा दिला होता. त्यानंतर भाजपला सोडचिठ्ठी देत ते तृणमूल काँग्रेसमध्ये दाखल झाले होते. त्यामुळे या जागेवर लोकसभेची पोटनिवडणूक होत आहे.
लोकसभेच्या एका जागेसोबतच बंगालमध्ये एका विधानसभा जागेसाठी पोटनिवडणूक होत आहे. तसेच छत्तीसगड, महाराष्ट्र आणि बिहारमध्ये प्रत्येकी एका विधानसभेच्या जागेसाठी पोटनिवडणूक होणार आहे. 12 एप्रिलला होणाऱ्या या पोटनिवडणुकीचे निकाल 16 एप्रिलला जाहीर होणार आहेत.