खासदार संभाजीराजे छत्रपती मराठा आरक्षणाच्या पार्श्वभूमीवर मोठा निर्णय घेण्याच्या तयारीत आहेत. सभाजीराजे गेल्या काही महिन्यांपासून मराठा समाजातील अनेक दिग्गजांच्या भेटी घेत होते. राज्यभरातील अनेकांना भेटून त्यांनी चर्चा केली.
विशेष म्हणजे त्याआधी त्यांनी मराठा आरक्षणासाठी आंदोलन देखील केलं होतं. त्यानंतर राज्यभरात फिरुन त्यांनी समाजातील विविध घटकांशी चर्चा केली. या सर्व घडामोडींनंतर संभाजीराजेंनी महत्त्वाचा निर्णय घेतला आहे. त्या निर्णयाबाबत ते उद्या खुलासा करणार आहेत.
संभाजीराजे यांनी ट्विटकरुन याबाबतची माहिती दिली आहे. त्यांच्या या ट्विटनंतर संभाजीराजे आंदोलनाची घोषणा करणार की काय? अशी चर्चा आता सुरु झाली आहे.
“मराठा आरक्षण व समाजाच्या इतर अनुषंगिक मागण्यांबाबत समाजातील सर्व क्षेत्रातील मुख्य घटकांशी विचार विनिमय करुन मी माझी पुढील दिशा ठरविलेली आहे. याबाबत उद्या 14 फेब्रुवारीला सकाळी अकरा वाजता मुंबई येथे पत्रकार परिषद घेऊन ती स्पष्ट करणार आहे”, असं संभाजीराजे ट्विटरवर म्हणाले.
