बिअरसाठी पैसे दिले नाही म्हणून 2 मित्रांनी त्यांच्या मित्राच्या पोटात बिअरची बॉटल खुपसल्याची धक्कादायक घटना चंद्रपूर जिल्ह्यातील बल्लारपूर शहरात उघडकीस आली आहे. बल्लारपूर शहरातील बरसा मुंडा चौकातील ही घटना असून पोलिसांनी दोन्ही आरोपींना अटक केली आहे.
हे तिन्ही मित्र बिअर पीत बसले होते. मात्र अजून बिअर पिण्यासाठी आरोपींनी शाहरुख पठाण या मित्राकडे पैसे मागितले. मात्र त्याने पैसे देण्यास नकार देताच त्यांच्यात वाद झाले. त्यानंतर इतर दोघांनी एक बिअरची बॉटल फोडली व ती शाहरुखच्या पोटात खुपसली. त्यानंतर ते त्याला तेथून टाकून पळून गेले. काही स्थानिक लोकांनी शाहरुखला रुग्णालयात दाखल केले आहे.
याप्रकरणी बल्लारपूर पोलिसांनी नीरज यादव आणि अंकित रामटेके यांना अटक केली असल्याची माहिती बल्लारपूर पोलीस ठाण्याचे निरीक्षक उमेश पाटील यांनी सांगितले.
