गाढ झोपेत असलेल्या पत्नीची क्रुरपणे पतीने हत्या केल्याची खळबळजनक घटना जिल्ह्यातील गोंडपिपरी तालुक्यात येणाऱ्या वेडगाव येथे गुरुवारचा मध्यरात्री घडली. मुलं कापूस भरायला गेली असताना पतीने कुऱ्हाडीने गळ्यावर वार करून पत्नीची हत्या केली. लता दामोदर धुडसे (४०) असे मृतक महिलेचे नाव आहे. घटना उघडकीस येतात गाव हादरले आहे. गावकऱ्यांनी घटनेची माहिती पोलीस विभागाला दिली. पोलिसांनी घटनास्थळ गाठण्याआधीच पती दामोधर मारोती धुडसे फरार झाला आहे. पोलीस आरोपीचा शोध घेत आहेत. दरम्यान हत्येचे नेमकं कारण अद्याप पुढे आलेले नाही.
मिळालेल्या माहितीनुसार, गोंडपिपरी तालुक्याचा शेवटचा टोकावर असलेलं वेडगाव हे लहानस गाव. या गावात गुरुवारच्या मध्यरात्री हत्येचा थरार घडला. गावातील दामोधर मारोती धुडसे यांची दोन मुले कापसाची गाडी भरायला गेले होते. पत्नी लता धुडसे या गाढ झोपेत होत्या. मध्यरात्रीचा सुमारास पती दामोधर याने हातात कुऱ्हाड उचलली. त्याने लता हिचा मानेवर सपासप वार केले. यात तिचा घटनास्थळीच मृत्यू झाला. घरात रक्ताचा सळा सांडला होता.
घटनेची माहिती मिळताच गावकऱ्यांनी दामोधर याच्या घराकडे धाव घेतली. काहींनी पोलिसांना घटनेची माहिती दिली. गावकऱ्यांना बघताच दामोधर हा घटनास्थळावरून फरार झाला. चंद्रपूर जिल्ह्याचे पोलीस अधीक्षक मुमक्का सुदर्शन, अप्पर पोलीस अधीक्षक रीना जनबंधु यांनी घटनास्थळ गाठले. त्यांच्या मार्गदर्शनात लाठीचे ठाणेदार युवराज शहारे यांनी मोका पंचनामा केला. आरोपीवर हत्येचा गुन्हा दाखल करण्यात आला आहे. फरार असलेल्या पतीचा शोध पोलीस घेत आहे. पुढील तपास लाठी पोलीस करीत आहेत.
