अल्पवयीन मुलीने प्रियकराशी लग्नासाठी हट्ट केल्यानं आईनेच तिची गोळी झाडून हत्या केल्याचा धक्कादायक प्रकार समोर आला आहे. १५ वर्षांच्या मुलीचे शेजारी राहणाऱ्याच एका मुलावर प्रेम होतं आणि तिला त्याच्याशीच लग्न करायचं होतं. आईने मुलगी हट्ट सोडत नसल्याने गोळ्या झाडून हत्या केली. पोलिसांनी या प्रकरणी आईला अटक केली आहे. ज्या पिस्तुलातून गोळी झाडली ते पिस्तुल जप्त करण्यात आलंय. झारखंडच्या गिरिडीहमध्ये ही घटना घडलीय.
बगोदरमधील एका अल्पवयीन मुलीची शनिवारी सायंकाळी गोळी झाडून हत्या करण्यात आली होती. या घटनेनंतर परिसरात मोठी खळबळ उडाली होती. दरम्यान मुलीच्या आईने पोलीस ठाण्यात हजर होत आपणच हत्या केली असल्याचं सांगितलं. जेव्हा ही बाब सर्वांना समजलं तेव्हा सर्वांनाच धक्का बसला. तर या प्रकरणी आरोपी महिलेच्या पतीने पोलिसात तक्रार दाखल केली आहे. पोलिसांनी महिलेला मुख्य आरोपी केलं आहे.
याप्रकरणी एसडीपीओ नौशाद आलम यांनी सांगितलं की, प्रेमप्रकरणातून अल्पवयीन मुलीला गोळी मारून आईने तिची हत्या केली. मुलीचं लग्न आई दुसऱ्या मुलासोबत लावून देणार होती पण मुलगी प्रियकरासोबतच लग्नासाठी हट्ट धरून बसली होती. यामुळे आईने मुलीला गोळी झाडून ठार केलं. पिस्तुल कुठून मिळाली आणि ते कधी आणलं याचा तपास आता पोलीस करत आहेत.
