गुजरातच्या राजकोट जिल्ह्यातील जसदणमध्ये अंधश्रद्धेतून धक्कादायक घटना उघडकीस आली आहे. विंछिया गावातील एका दाम्पत्यानं मुलांना मामाच्या घरी पाठवलं. त्यानंतर शेतात होम कुंड तयार करून त्यात स्वत:ला झोकून दिलं. स्वत:ची आहुती देण्यापूर्वी त्यानं विधीवत पूजाअर्चा केली होती. या दरम्यान त्यांनी कमळाची पूजा केली. पोलिसांना घटनास्थळी सुसाईड नोट सापडली. आम्ही आपल्या मर्जीनं स्वत:ची आहुती दिल्याचं नोटमध्ये नमूद आहे. आमच्या मृत्यूनंतर कोणालाही त्रास दिला जाऊ नये असं आवाहनदेखील त्यांनी केलं आहे. मंत्रतंत्र आणि अंधश्रद्धेतून घडलेल्या या घटनेमुळे सगळेच चक्रावले आहेत.
विंछियामध्ये राहणारे हेमू मकवाना आणि त्यांची पत्नी हंसा मकवाना यांनी शनिवारी रात्री मांत्रिक विधी केले. या दरम्यान त्यांनी कमळाची पूजा केली. होम कुंडाजवळ त्यांनी गिलोटिन मशीन ठेवलं होतं. त्याला दोरी बांधण्यात आली होती. दाम्पत्यानं दोरी सोडताच त्यांचं शिर गिलोटिन मशीनच्या ब्लेडखाली आलं. त्यामुळे शिर धडावेगळं होऊन ते समोर असलेल्या अग्निकुंडात पडलं, अशी माहिती विंछिया पोलीस ठाण्याचे पोलीस उपनिरीक्षक इंद्रजीतसिंह जाडेजा यांनी दिली.
होमकुंडात स्वत:ची आहुती देण्यापूर्वी जोडप्यानं भिंतीवर सुसाईड नोट चिकटवली होती. लोकांना सहज पाहता येईल अशा पद्धतीनं नोट भिंतीवर चिकटवण्यात आली होती. तंत्रमंत्राच्या आहारी जाऊन मकवाना दाम्पत्यानं हे पाऊल उचलल्याचं बोललं जात आहे. जोडप्याला एक मुलगा आणि मुलगी आहे. दोघांचं वय १५ वर्षांपेक्षा कमी आहे. स्थानिक पोलीस घटनेचा तपास करत आहेत.
