प्रेम अंधळं असतं आणि त्यात कोणत्याही थराला जाण्याची तयारी असते याची प्रचिती पुन्हा आली आणि महाराष्ट्र हादरला आहे. प्रेमात अडथळा ठरणाऱ्या पतीला पत्नी आणि तिच्या प्रियकराने मिळून संपवल्याची धक्कादायक घटना समोर आली आहे. पतीला संपवण्यासाठी चक्क दीड लाख रुपयांची सुपारी देण्यात आली होती.
प्रेमात अडथळा ठरत असलेल्या पतीचा पत्नी आणि तिच्या प्रियकराने दीड लाखांची सुपारी देऊन हत्या केली आहे. हा धक्कादायक प्रकार समोर आल्यानंतर पोलीसही चक्रावले आहेत. या प्रकरणी गुन्हे शाखेच्या पथकाने आरोपी पत्नी, तिच्या प्रियकरासह पुण्यातून पाच आरोपींना बेड्या ठोकल्या आहेत.
श्रीगोंदा तालुक्यातील कोथूळ येथे योगेश सुभाष शेळके या तरुणाच्या खुनाचा छडा लावण्यात स्थानिक गुन्हे शाखेच्या पथकाला यश आले आहे. आरोपी पत्नी आणि तिच्या प्रियकराने योगेशच्या खुनाचा कट रचला. विशेष म्हणजे पत्नीनेच पोलिसांत याबाबत फिर्याद दिली होती. फिर्यादीच आरोपी निघाल्याने पोलिसांसह सर्वांनाच धक्का बसला आहे.
योगेश सुभाष शेळके हा पत्नी आणि आई- वडिलांसह कोथूळ गावात राहत होता. त्याच्या पत्नीचे गावातीलच रोहित साहेबराव लाटे याच्याशी प्रेमसंबंध होते. या दोघांमध्ये प्रेमसंबंध असल्याचा योगेशला संशय होता. या संशयातून तो पत्नीला शिवीगाळ आणि मारहाण करत होता. पती नेहमीच मारहाण करत असल्याने पत्नी आणि तिचा प्रियकराने मिळून नवऱ्याचा काटा काढायाचा प्लॅन केला.
