मुख्यमंत्री एकनाथ शिंदे गटातील आणखी एका व्यक्तीला धमकी मिळाल्याची धक्कादायक माहिती समोर आली आहे. आमदार आणि शिंदे गट प्रतोद भरत गोगावले यांच्या मुलाला जीवे मारण्याची धमकी आली आहे. भरत गोगावले यांचा मुलगा विकास गोगावले यांना जीवे मारण्याची धमकी देण्यात आली आहे. या प्रकरणी गावदेवी पोलीस ठाण्यात गुन्हा दाखल करण्यात आला आहे. विशेष म्हणजे हा धमकीचा फोन पहिला नाहीय. अज्ञात व्यक्तींकडून वारंवार धमकीचे फोन येत असल्याची माहिती समोर आली आहे.
“मला गेल्या दोन दिवसांपासून अनोळखी नंबरवरुन धमकीचे फोन येत आहेत. याशिवाय माझे वडील भरत गोगावले यांना गेल्या काही दिवसांपासून सातत्याने धमकीचे फोन येत आहेत. तुम्ही पक्ष कसा वाढवतात ते आम्ही बघतो, असे धमकी देणारे बोलतात. आम्ही या गोष्टी टाळत होतो. पण वरिष्ठ पोलिसांसोबत बातचित केल्यानंतर त्यांनी तक्रार करण्याची सूचना केली. त्यानुसार आम्ही तक्रार केली आहे”, अशी प्रतिक्रिया विकास गोगावले यांनी दिली.