शिवसेनेच्या मंत्र्याचे twitter अकाऊंट हॅक, परदेशी व्यक्तीचा झळकला फोटो!

गुलाबराव पाटील यांचे ट्विटरवर हे अधिकृत अकाऊंट आहे. याच अधिकृत ट्विटर अकाऊंटवर ते नेहमी ट्विट करत असतात. हे अकाऊंट व्हेरीफाईड देखील आहे. मात्र, गेल्या काही तासांपासून त्यांच्या ट्विटर अकाऊंटवर संशयास्पद बाबी आढळून आल्या आहेत. यातील सर्वात लक्षणीय बाब म्हणजे, त्यांच्या अकाऊंटची आधी सर्वांसाठी खुली असणारी टाईमलाईन ही प्रोटेक्टेड करण्यात आली आहे.

याबाबत गुलाबराव पाटील यांनी स्वतः सोमवारी रात्री पोलीस अधीक्षकांकडे तक्रार केली आहे. सायबर पोलीस या प्रकरणाचा तपास करत आहेत, असे गुलाबराव पाटील यांनी सांगितले.

दरम्यान, शिवसेना नेते तथा राज्याचे वनमंत्री संजय राठोड यांनी राजीनामा दिल्याची मला न्यूज चॅनलच्या माध्यमातून माहिती मिळाली आहे. या प्रकरणाची चौकशी मुख्यमंत्र्यांच्या आदेशानुसार सुरू झाली आहे. चौकशीत काय निष्पन्न होईल, त्यानुसार कारवाई होईल, असं गुलाबराव पाटील यावेळी म्हणाले.