भाजप नेत्याच्या मुलीची आत्महत्या, विनयभंगाला कंटाळून उचललं टोकाचं पाऊल

उत्तर प्रदेशमध्ये गुन्हेगारी चांगलीच वाढली आहे. खून, बलात्कार, दरोडा, विनयभंग अशा घटना सारख्या समोर येत असतात. आता अशीच एक धक्कादायक घटना रामपूरमधून समोर आली आहे. एका भाजप नेत्याच्या आठवीत शिकणाऱ्या मुलीने विनयभंगाला कंटाळून टोकाचं पाऊल उचलल्याचं समोर आलं आहे.

भाजप महिला मोर्चाच्या नेत्याच्या मुलीने मंगळवारी दुपारी गळफास घेऊन आत्महत्या केली. ही मुलगी आठवीत शिकत होती. विनयभंगाला कंटाळून तिने हे कृत्य केल्याचे सांगितलं जात आहे. पोलीस या प्रकरणी तपास करत आहेत. या घटनेमुळे परिसरात खळबळ उडाली आहे.

आरोपी अनेक दिवसांपासून विद्यार्थिनीला त्रास देत होता. त्याने तिच्यावर एकदा बलात्काराचा प्रयत्न केल्याचं समोर आलं आहे. आरोपीने पीडितेचा एक अश्लील व्हिडिओ बनवला होता. तो व्हिडिओ व्हायरल करण्याची सारखी धमकी तो पीडितेला देत होता. त्यामुळे पीडिता घाबरली होती. आरोपीच्या सततच्या छळाला कंटाळून तिने जीवन संपवलं आहे. याप्रकरणी पोलिसांनी 4 आरोपींविरुद्ध गुन्हा दाखल केला आहे.

रामपूरमध्ये आठवडाभरात दोन विद्यार्थिनींनी आत्महत्या केल्याची घटना घडली आहे. मुलींच्या सुरक्षेची जबाबदारी असलेले पोलीस ठाणे आणि अँटी रोमिओ पथकही हे थांबवू शकलेले नाही. आठवडाभरात जिल्ह्यातील ही दुसरी घटना घडल्याने सर्वांनाच धक्का बसला आहे. दुसऱ्या घटनेची बळी ही सत्ताधारी पक्षाच्या महिला पदाधिकाऱ्याची मुलगी आहे.