अनैतिक संबंध जीवावर बेतले; हत्या करून मृतदेह घाटात फेकला

छत्रपती संभाजीनगरमधून एक धक्कादायक घटना समोर येत आहे. अनैतिक संबंधातून एकाची हत्या करण्यात आली आहे. सिल्लोड येथील ही घटना आहे. या घटनेनं जिल्हात खळबळ उडाली आहे. या प्रकरणात पोलिसांनी दोन जणांना अटक केली आहे, तर आणखी दोघांचा शोध सुरू सुरू असल्याची माहिती पोलिसांकडून देण्यात आली आहे. राजू बाबुलाल महेर राहणार पळसी असं हत्या झालेल्या व्यक्तीचं नाव आहे.

घटनेबाबत अधिक माहिती अशी की, रेणूकाबाई राजू महेर यांनी 15 जून 2023 रोजी आपला पती बेपत्ता असल्याची तक्रार सिल्लोड ग्रामीण पोलीस स्टेशनला दिली होती. तक्रार प्राप्त होताच सायबर सेलच्या मदतीनं पोलिसांनी तपासाची चक्र फिरवली. राजू यांची अनैतिक संबंधातून हत्या करण्यात आल्याचं पोलीस तपासात समोर आलं. आरोपींनी 4 जून 2023 रोजी राजू महेर यांची हत्या करून मृतदेह अजिंठा घाटात फेकून दिला होता. कुजलेल्या स्थितीमध्ये त्यांचा मृतदेह आढळून आला होता.

प्रकरणात पोलिसांनी आरोपी गणेश महेताब महेर आणि करण नारायण बारवाल या मामा-भाच्यांना अटक केली आहे. आणखी दोन आरोपींचा शोध सुरू असल्याची माहिती पोलिसांकडून देण्यात आली आहे.