चंदन मध्यरात्री घराबाहेर पडला तो अखेरचा, सकाळी पडक्या घरात सापडला, दोरी दिसल्यानं गूढ वाढलं

राज्याची उपराजधानी असलेल्या नागपूर शहरामध्ये दोरीने गळा आवळून १७ वर्षीय मुलाचा खून करण्यात आल्याची धक्कादायक घटना उघडकीस आली आहे. ही थरारक घटना रविवारी सकाळी कळमना पोलीस स्टेशन हद्दीतील गुलमोहरनगर येथे उघडकीस आली. या घटनेने पोलीस व रहिवाशांमध्ये खळबळ उडाली आहे. चंदन कन्हय्या लहरे,असे मृत मुलाचं नाव आहे. तो टाइल्स फिटिंगचे काम करायचा.

पोलिसांनी दिलेल्या माहितीनुसार, चंदनचे वडील कन्हय्या खासगी काम करतात. त्याला लहान भाऊ आहे. मध्यरात्री चंदन हा घराबाहेर निघाला. रविवारी सकाळी चंदन हा घराबाजूला असलेल्या पडक्या घरात बेशुद्ध अवस्थेत नागरिकाला दिसला.त्याच्या गळ्याभोवती दोरी होता. एखा नागरिकाने त्याच्या वडिलाला माहिती दिली. वडिलाने नागरिकांच्या मदतीने चंदनला घरात आणले.

दरम्यान, १७ वर्षीय मुलाचा खून झाल्याची माहिती कळमना पेालिसांना मिळाली. माहिती मिळताच वरिष्ठ पोलीस निरीक्षक विनोद पाटील यांच्यासह कळमना पोलिसांचा ताफा तेथे पोहोचला. पंचनामा करून पोलिसांनी मृतदेह मेडिकल कॉलेज हॉस्पिटलकडे रवाना केला. चंदनचा खून करण्यात आला की त्याने आत्महत्या केली हे शवविच्छेदन अहवाल आल्यानंतर स्पष्ट होईल. तूर्त कळमना पोलिसांनी आकस्मिक मृत्यूची नोंद करून तपास सुरू केला आहे.