आमच्या ग्रामपंचायती विषयी का बोलतो, सरपंच माजी पंचायत समिती सदस्यामध्ये फ्रीस्टाइल हाणामारी

तू आमच्या ग्रामपंचायतीविषयी का बोलत आहेस, असे विचारून दम दिल्यानंतर झालेल्या वादानंतर सरपंच आणि माजी पंचायत समिती सदस्यामध्ये फ्रीस्टाईल हाणामारी झाली. पंचायत समितीच्या कार्यालयामध्येच ही हाणामारी झाली आहे. ही घटना परभणीच्या जिंतूर पंचायत समितीमध्ये घडली आहे. या ठिकाणी उपस्थित असलेल्या काही नागरिकांनी मध्यस्थी केल्यानंतर पुढील अनर्थ टळला आहे. दरम्यान या प्रकरणी अद्यापपर्यंत पोलिसांमध्ये नोंद करण्यात आलेली नाही.

परभणीच्या जिंतूर तालुक्यातील धमधम येथील पंचायत समितीचे माजी सदस्य केशव घुले हे जिंतूर पंचायत समितीमध्ये आले. ते विस्तार अधिकाऱ्यांना विहिरीचे मस्टर न काढता रस्त्याचे मस्टर का काढले याविषयी जाब विचारत होते. हा प्रकार सुरू असताना त्या ठिकाणी धमधम गावचे सरपंच वाल्मीक ठाकरे त्या ठिकाणी आले. तू आमच्या ग्रामपंचायती विषयी का बोलत आहेस, असे म्हणून त्यांनी माजी पंचायत समिती सदस्य केशव घुले यांच्यासोबत वाद घातला आणि घुले यांना दम दिला.

यावेळी बाचाबाची सुरू असताना पंचायत समितीची माजी सदस्य केशव घुले आणि सरपंच वाल्मीक ठाकरे हे एकमेकांना भिडले दोघांमध्ये चांगलीच बाचाबाची आणि फ्रीस्टाइल हाणामारी झाली. यावेळी पंचायत समितीमध्ये उपस्थित असलेल्या काही नागरिकांनी मध्यस्थी करून त्यांचे भांडण सोडवल्याने पुढील अनुचित प्रकार टळला आहे. धमधम येथे झालेल्या कामांमध्ये गैरप्रकार झाला असून त्या कामाची चौकशी सुरू असल्याने दोघांमध्ये वाद झाला असल्याची चर्चा ऐकयला मिळत आहे. दरम्यान, या प्रकरणी जिंतूर पोलीस ठाण्यामध्ये कुठल्याही प्रकारची नोंद करण्यात आलेली नाही.