मानेवरच्या उपचारासाठी मुख्यमंत्री उद्धव ठाकरे रुग्णालयात, जनतेला केले आवाहन

मुख्यमंत्री उद्धव ठाकरे हे बुधवारी मानेवरच्या उपचारासाठी रुग्णालयात दाखल होणार आहेत. त्यांच्यावर रुग्णालयात तीन दिवस उपचार होणार आहेत. मुख्यमंत्री कार्यालयाकडून एक पत्रक सादर करण्यात आले असून त्यातून मुख्यमंत्री उद्धव ठाकरे यांनी जनतेला एक आवाहन केले आहे.

गेल्या सुमारे दोन वर्षांपासून आपण कोविडचा मुकाबला करतो आहोत. एकीकडे या विषाणूशी लढाई सुरू असतांना दुसरीकडं आपलं जीवनचक्र सुरू राहावं. राज्यातली विकास कामं सुरूच राहावीत म्हणून आम्ही सगळे कुठेही न थांबता सातत्यानं प्रयत्न करतोय. मान देखील वर करायला वेळ मिळत नव्हता, साहजिकच माझ्या मानेच्या दुखण्याकडे नाही म्हणलं तरी थोडंसं दुर्लक्ष झालं आणि मानेवर जो परिणाम व्हायचा तो झालाच !

पण या दुखण्यावर व्यवस्थित उपचार व्हावेत यादृष्टीनं डॉक्टरांनी सल्ला दिल्यावरून मी आज रुग्णालयात दाखल होणार असून दोन तीन दिवस तिथेच राहून योग्य ते उपचार घेणार आहे. आपले आशीर्वाद माझ्या पाठीशी आहेत, त्यामुळं लवकरच तब्येत बरी होईल अशी खात्री आहे.

यानिमित्ताने एकच सांगायचं आहे. कोरोना लसींच्या बाबतीत आपण 10 कोटींचा टप्पा ओलांडला असला तरी आपल्याला सर्वांना लसींचे दोन डोस घेणे अतिशय महत्वाचे आहे. आपल्या जीवनाला सुरक्षित ठेवण्यासाठी लगेचच जवळच्या केंद्रावर जाऊन लस घ्या एवढीच विनंती करतो, असे मुख्यमंत्री उद्धव ठाकरे यांनी या निवेदनातून म्हटले आहे.